Frikë dhe ankth në bashkësinë katolike indoneziane, pas sulmit të djeshëm, gjatë meshës të së dielës, në San Lidwina, afër Yogyakarta, qytet në qendër të ishullit të Javës. Një person i çekuilibruar, që, sipas agjencisë katolike Fides, quhet Suliyono, hyri në kishë me një çomage, duke arritur të plagosë rreth 10 besimtarë, si edhe meshtarin, që po kremtonte meshën e orës 7.30 të mëngjesit. Meshtari është atë Karl-Edmund Prier, jezuit me origjinë gjermane.
Njëri nga besimtarët i telefonoi policisë dhe u përpoq të bisedonte me sulmuesin, por pa rezultat. Agjentëve iu desh të qëllonin për ta ndalur, duke e plagosur rëndë. Vijojnë hetimet për të kuptuar arsyen e sulmit, e cila, tani për tani, nuk është e qartë.
Kisha lokale u kërkon forcave të rendit “të garantojnë mbrojtjen dhe sigurinë e vendeve të kultit” dhe “të parandalojnë episode të tjera dhune, në respektin e të drejtave themelore të gjithë qytetarëve indonezianë, pa përjashtim”. Sipas vëzhguesve, ka përpjekje politike për ta instrumentalizuar fenë dhe për t’i përçarë qytetarët mbi bazën e saj. Pak ditë më parë, besimtarët e një famullie tjetër katolike, që po shpërndanin ndihma humanitare, u ndaluan nga një grup myslimanësh, që i akuzuan për prozelitizëm. Rritja e intolerancës në Indonezi vihet në dukje edhe nga OKB-ja.
All the contents on this site are copyrighted ©. |