Takimi i Françeskut me dy familjarë të viktimave të diktaturës së Pinoçetit

Në përfundim të meshës së djeshme në Campus Lobito të Iquique-s - ngjarja e fundit e vizitës apostolike në Kili - Papa Françesku shkoi në Shtëpinë për të moshuar, në shenjtëroren Zoja e Lurdës, që të drekonte me delegacionin papnor. Por, para drekës, një takim tjetër domethënës: në kishën pranë, e prisnin 10 të sëmurë dhe 2 familjarë të viktimave të diktaturës së Pinoçetit, në vitet ’70. Ata i dorëzuan një letër.

Shpresa për të gjetur të burgosurit “desaparecidos”

         “Papa Françesku, në duart tuaja vë shpresën për të gjetur të burgosurit tanë ‘desaparecidos’”, i tha Atit të Shenjtë njëri prej tyre, Hector Marin Rosset, vëllai i të cilit, Jorge, u kap më 28 shtator 1973 dhe u ekzekutua po atë ditë në Iquique. Ishte vetëm 19 vjeç. Rosset është president i Shoqatës së familjarëve të viktimave të regjimit dhe të të burgosurve të zhdukur në Iquique e në Pisagua.

         Sipas Sallës së Shtypit të Vatikanit, Rosset i shprehu Papës vlerësimin e tij për impenjimin e Kishës kiliane në promovimin dhe mbrojtjen e të drejtave të njeriut. Në letër, ai i përshkruan Papës angazhimin e grupit që drejton, për të gjetur familjarët “desaparecidos” dhe uron bashkëpunimin e forcave të armatosura e të qeverisë së Kilit për këtë. Është, tha ai, një kryqëzatë humanitare “që do të na mundësojë të arrijmë paqen shpirtërore për të cilën kemi kaq nevojë”.