“Të dëgjohet me vëmendje britma e vëllezërve tanë të varfër e të përjashtuar”.
Parandalim, jo korrupsion. Kjo, thirrja që i drejtoi Papa Françesku Fao-s, gjatë
fjalimit mbajtur me rastin e “Ditës botërore të ushqimit”.
Në hartimin e “Pacto mundial para una migración segura, regular y ordenada” (Paktit
botëror për një emigrim të sigurt, të rregullt e të disiplinuar) në vijim këtë çast
në gjirin e Kombeve të Bashkuara, të dëgjohet me vëmendje britma e vëllezërve
tanë të varfër e të përjashtuar: “Kam uri, jam i huaj, i zhveshur, i sëmurë, i mbyllur
në një kamp refugjatësh!”. Këtë kërkoi Papa në fund të fjalimit të sotëm
drejtuar Fao-s: “Është kërkesë për drejtësi, jo lutje, as thirrje emergjence” - shpjegoi
Françesku, sipas të cilit është i nevojshëm dialogu në të gjitha nivelet, që të gjinden
rrugëzgjidhjet më të mira e më të matura për autorët e ndryshëm të skenarit ndërkombëtar,
realizuar me përgjegjësi reciproke, solidaritet e bashkim”. “Zgjedha e mjerimit,
që lind nga zhvendosjet, shpesh tragjike, të emigrantëve - propozon Papa - mund të
lehtësohet përmes parashikimit të realizuar me anën e projekteve të zhvillimit, që
krijojnë punë si dhe aftësisë për t’iu përgjigjur krizave klimaterike e ambientale".
Parandalimi kushton shumë më pak se pasojat e shkaktuara nga degradimi i
terreneve ose nga ndotja e ujërave, pasoja që godasin zonat nevralgjike të planetit,
ku varfëria është i vetmi ligj; sëmundjet, gjithnjë në rritje e shpresa për të jetuar,
gjithnjë më e zbehtë - vërejti Françesku. - Nismat e shumta, në vijim, nuk mjaftojnë.
Është e nevojshme të aktivizohen përpjekjet dhe programet financiare, për t’i bërë
ballë edhe më me sukses urisë e mjerimit strukturor. Por nëse objektivi
është favorizimi i bujqësisë, që prodhon në funksion të kërkesave reale të një vendi,
atëherë nuk është e ligjshme t’i merren tokat e kultivuara popullsisë, duke lejuar
që land grabing, apo pronarët e rinj të tokave blerë nga bujqit vendas, të vijojnë
t’i shfrytëzojnë me fitime të ndjeshme, “ndoshta-ndoshta edhe në bashkëpunim me ata,
që janë të thirrur të mbrojnë interesat e popullit” - kjo padia e Papës,
që kërkoi të shmangen tundimet për të punuar në dobi të grupeve të ngushta të popullsisë,
si dhe për të përdorur pa nevojë mallra të ardhura nga jashtë, duke favorizuar korrupsionin,
sidomos atje ku mungon ligjshmëria.
All the contents on this site are copyrighted ©. |