“Hyjit tonë i përket drejtësia, kurse neve faqja e zezë”: me këto fjalë, Baruku
profet, në Leximin e parë të sotëm, na flet për mosbindjen ndaj ligjit të Zotit, pra,
për mëkatin e, njëkohësisht na tregon “udhën e vërtetë” për të kërkuar falje. Mbi
këtë pjesë reflektoi sot Papa Françesku, në meshën e mëngjesit në Shtëpinë e Shën
Martës. Ati i Shenjtë u ndal në realitetin e mëkatit, që i karakterizon
gjithë njerëzit, ashtu siç thuhet në profecinë e Barukut:
“Askush
nuk mund të thotë: ‘Unë jam i drejtë’, ose ‘unë nuk jam si ai apo si ajo’. Unë jam
mëkatar! Do të thosha se gati-gati, ky është emri i parë, që kemi të gjithë: mëkatarë.
E pse jemi mëkatarë? Sepse nuk i jemi bindur Zotit: Ai na ka thënë një gjë
e ne kemi bërë një tjetër. Nuk e kemi dëgjuar zërin e Zotit: Ai na ka folur shumë
herë. Në jetë, secili mund të mendojë: ‘Sa herë më ka folur Hyji…E sa herë
nuk e kam dëgjuar!’ Flet me prindërit, me familjen, me katekistin, në kishë, në homeli,
e flet edhe me zemrën tonë”.
Por ne jemi rebeluar: ky është pra, mëkati, “rebelimi”, “kokëfortësia”,
ndjekja e devijimeve të zemrës, duke rënë në idhujtaritë e vogla të përditshme, në
mëkatet e lakmisë, të zilisë, të urrejtjes, por në veçanti, përmendi Papa, në mëkatin
e “shpifjes”, të thashethemeve, që Ati i Shenjtë i quajti “luftë për ta shkatërruar
tjetrin”. Mëkati, theksoi Papa Françesku, na shkatërron edhe zemrën, jetën,
shpirtin, por mbetet gjithnjë mëkat kundër Zotit, që na prish marrëdhëniet me Të:
“Nuk
është njollë, që mund të hiqet. Nëse do të ishte njollë, do të mjaftonte të shkonim
në dyqanin e pastrimit dhe ta fshinim… Jo! Mëkati është rebelim kundër Zotit. Është
i shëmtuar në vetvete, por bëhet edhe më i shëmtuar, sepse i kundërvihet Zotit, që
është i mirë. Nëse i mendoj kështu mëkatet e mia, në vend që të bie në depresion,
provoj një ndjenjë të thellë: turpin, faqen e zezë për të cilën flet Baruku profet.
Turpi është hir”.
E turpi na hap portat e shërimit, theksoi Papa Françesku, i cili i ftoi të gjithë
të ndjejnë turp para Zotit për mëkatet e të kërkojnë falje:
“Kur
Zoti na sheh kështu, të turpëruar për ç’kemi bërë dhe, me përvuajtëri i kërkojmë falje,
Ai që është i gjithpushtetshëm, i shlyen mëkatet, na përqafon, na përkëdhel e na fal.
Kjo është rruga për të marrë faljen, që na mëson sot Baruku profet. Ta lëvdojmë Zotin,
sepse e shfaqi gjithpushtetin e vet, përmes mëshirës dhe faljes”.