Lexo artikullin Shko tek menyja

rrjete shoqërore:

RSS:

Radio Vatikani

zëri i Papës dhe i Kishës në dialog me botën

Gjuha:

Papa Françesku \ Kremtime

Papa Françesku: paqja e Jezusit është e vërtetë, jo ajo e botës

Papa Françesku kremton meshën në Shtëpinë e Shën Martës

16/05/2017 13:26

Paqen e vërtetë nuk mund ta prodhojmë, është dhuratë e Shpirtit Shenjt. Kështu tha sot Papa Françesku, gjatë homelisë së meshës kremtuar në Shtëpinë e Shën Martës, në Vatikan. Ati i Shenjtë nënvizoi se “paqja pa Kryqin, nuk është paqja e Jezusit” dhe kujtoi se Zoti mund të na japë paqen edhe në mesin e mundimeve.

Zoti na e dhuron paqen edhe në mundime

“Po ju lë paqen, po ju jap paqen time”. Këto janë fjalët e Krishtit në Darkën e Mbrame, mbi të cilat e mbështeti homelinë Papa. Por paqja e Jezusit është e ndryshme nga ajo e botës, nënvizoi. Paqja e botës nuk i parashikon mundimet, por është artificiale, reduktohet në “qetësi”, në sigurinë se nuk na mungon asgjë; është paqe, që nuk na lë të shohim përtej hundës sonë, ashtu si pasaniku për të cilin flet Shkrimi Shenjt, theksoi Françesku:

“Bota na mëson rrugën e paqes me anestezi: na deh për të mos e parë realitetin tjetër të jetës: Kryqin. Prandaj, shën Pali [në Leximin e parë] thotë se duhet hyrë në Mbretërinë e Qiellit përmes rrugës së mundimeve. Por, a mund të kemi paqe në mundime? Nëse do të varej prej nesh, jo: ne nuk jemi në gjendje të arrijmë paqen e qetësisë së shpirtit, paqen psikologjike, sepse ekzistojnë mundimet: kush një dhimbje, kush një sëmundje, kush një vdekje… ekzistojnë. Ndërsa paqja e Jezusit është dhuratë: është dhuratë e Shpirtit Shenjt. E kjo paqe dhurohet edhe në mesin e mundimeve. Nuk është ndonjë lloj stoicizmi, si ai i fakirit: jo. Është tjetër gjë”.

Paqja e Zotit nuk mund të blihet

Paqja e Zotit, vijoi Papa Françesku, është dhuratë, që na bën të ecim përpara. Krishti, pasi u dha paqen dishepujve të vet, vuan në Kopshtin e Ullinjve e aty ofron vetveten për të plotësuar vullnetin e Atit Qiellor. Vuan vërtet, theksoi Ati i Shenjtë, por nuk i mungon ngushëllimi i Zotit. Ungjilli tregon se në qiell u duk një engjëll për ta ngushëlluar:

“Paqja e Zotit është e vërtetë, hyn në realitetin e jetës, nuk e mohon jetën: jeta është kështu. Ekziston vuajtja, ka të sëmurë, ka shumë gjëra të këqia, ka luftra… por paqja e brendshme, që është dhuratë, nuk humbet. Ne ecim përpara, duke mbartur kryqin dhe vuajtjen. Paqja pa Kryqin nuk është paqe e Krishtit: është paqe, që mund të blihet. Mund ta bëjmë ne, por nuk zgjat: përfundon”.

Të lutemi për hirin e paqes së shpirtit

 Kur zemërohemi, vërejti Papa, e humbasim paqen. Kur zemra shqetësohet e na kap ankthi, do të thotë se ajo nuk është e hapur për paqen e Krishtit, sepse nuk jemi në gjendje ta jetojmë jetën, ashtu si vjen, me të gjitha kryqet e dhimbjet. Duhet t’i lutemi Zotit që të na japë hirin e paqes së Tij, përfundoi Ati i Shenjtë:

“‘Duhet të hyjmë në Mbretërinë e Zotit përmes shumë mundimeve’. Hiri i paqes, që të mos e humbim paqen e brendshme… Duke folur për këtë, një shenjt thoshte: ‘Jeta e të krishterit është rrugë ndërmjet persekutimeve të botës e ngushëllimeve të Zotit” (Shën Augustini, De Civitate Dei XVIII, 51,ndr). Zoti na dhashtë ta kuptojmë mirë si është paqja, që Ai na dhuron përmes Shpirtit Shenjt”.

16/05/2017 13:26