Mesazh i Papa Palit VI drejtuar grave
E tani, po ju drejtohemi ju, gra të çdo shtrese shoqërore, bija, nuse, nëna e vejusha;
edhe juve, virgjëra të shuguruara e gra të pamartuara; jeni gjysma e familjes vigane
njerëzore.
Kisha, ju e dini, është krenare që e ka lartuar gruan, e ka çliruar dhe ka bërë të
shkëlqejë në rrjedhë shekujsh, në përkim me ndryshimet përkatëse, barazinë e saj thelbësore
me burrin.
Por vjen koha, e koha erdhi, në të cilën thirrja e gruas përsoset; ora në të cilën
gruaja fiton në shoqëri një ndikim, një rrezatim, një pushtetet, që nuk e kishte arritur
kurrë deri më sot.
Ju, gra, keni gjithnjë dhantinë e mbrojtjes së vatrës familjare,
dashurinë për zanafillën e saj e për vazhdimësinë e saj, për djepat. Jeni të pranishme
në misterin e jetës që nis; e të jetës, që shuhet. Teknika jonë rrezikon të bëhet
çnjerëzore. Pajtojini burrat me jetën. E, sidomos vigjiloni, ju lutemi, mbi ardhmërinë
e species sonë. Ndaleni dorën e burrit në se, në një çast çmendurie, do të tundohej
të shkatërronte qytetërimin njerëzor!
Nuse, nëna familjesh, edukatore të para të gjinisë njerëzore në fshehtësinë
e vatrave, përçojani bijve e bijave traditat e etërve e, njëkohësisht, përgatitini
për të përballuar edhe të papriturat e së ardhmes. Mos harroni se përmes bijve, nëna
është e pranishme edhe në atë ardhmëri, të cilën ndoshta nuk do ta shikojë!
Edhe ju, gra të pamartuara, përgjigjuni si duhet thirrjes e përkushtimit
tuaj. Shoqëria ju thërret nga të katër anët. E edhe vetë familja nuk mund të jetojë,
pa ato, që nuk kanë familje!
Ju, virgjëra të përkushtuara, sidomos, në një botë ku egoizmi dhe
kërkimi i kënaqësisë dëshiron t’ju diktojë ligjin, ruajeni pastërtinë, shpërfilljen,
përshpirtërinë. Jezusi, që i dha dashurisë bashkëshortore gjithë përsosurinë e vet,
e ka lartuar edhe heqjen dorë nga kjo dashuri njerëzore, kur bëhet për dashurinë e
pambaruar e vihet në shërbim të të gjithëve.
Gra, që kaloni çaste të vështira, së fundi, ju që rrini nën kryq, si Maria;
ju, që shpesh, në rrjedhë historie u dhatë burrave forcë të luftonin deri në fund
të fundit, të dëshmonin, deri në martirizim, ndihmojini përsëri të rigjejnë guximin
për punë të mëdha, njëherësh me durimin e kuptimin e pikënisjeve të përvuajta.
O ju, gra, që dini ta bëni të vërtetën të ëmbël, të butë, të pranueshme!
Përpiquni që shpirti i këtij Koncili të depërtojë në institucione, në shkolla, në
vatra, në jetën e përditshme.
Gra të mbarë universit, të krishtera e jo besimtare, që ju është
besuar jeta në këtë çast kaq të rëndë të historisë, ju përket juve ta shpëtoni paqen
në botë!
Pali VI 8 dhjetor 1965
All the contents on this site are copyrighted ©. |