Katolikët shqiptarë të Romës, në 50-vjetorin e fjalimit të 6 shkurtit

Bashkësia shqiptare e Romës reflekton mbi shkatërrimin e kishave e të xhamiave në Shqipëri, në 50-vjetorin e fjalimit famëkeq të Enver Hoxhës, që i hapi rrugën luftës kundër “zakoneve prapanike e mbeturinave fetare”. Të dielën, më 5 shkurt, një ditë para përvjetorit, në kishën e Shën Gjonit të Malvës, në Trastevere të Romës, do të mbahet një konferencë me temë “50 vjet nga shkatërrimi i tempujve të fesë”. Për ata që dëshirojnë të marrin pjesë në meshë, kujtojmë se ajo kremtohet në gjuhën shqipe, në orën 16.00, ndërsa konferenca fillon në orën 17.00.

Atë Aldo Skoda Pashkja, skalabrinian, zv.drejtor i SIMI-it (Instituti Ndërkombëtar i Skalabrinianëve për Emigracionin) e profesor teologjie në Universitetin Papnor Urbanian, do t’u flasë të pranishmëve mbi “Shkatërrimin e kishave gjatë diktaturës komuniste në Shqipëri”, ndërsa i ngarkuari me punë i ambasadës së Shqipërisë pranë Selisë së Shenjtë, z. Visar Zhiti, do të përqendrohet në persekutimin e martirëve, duke i parë në këndvështrimin e qëndresës para torturave e dhunës së çdo lloji dhe të shenjtërisë së jetës së tyre. Nuk do të mungojnë as tingujt e muzikës, që do ta mbushin kishën përmes zërit të sopranos Ana Lushi. Gjithçka, nën drejtimin e rektorit të kishës, don Pasquale Ferraro, njëkohësisht edhe përgjegjës baritor për emigrantët shqiptarë në Itali. Ai do të përshëndesë të pranishmit në fillim të veprimtarisë. Për kë dëshiron të marrë pjesë, kujtojmë se kisha gjendet në sheshin San Giovanni della Malva, në Trastevere të Romës.