Ipeshkvijtë kanadezë dënojnë vendosmërisht sulmin në Qendrën islamike të Quebec dhe shpërndajnë një komunikatë, nënshkruar nga kryetari i tyre, imzot Douglas Crosby, ipeshkëv i Hamilton. Në tekstin, rimarrë nga agjencia Sir, ipeshkvijtë shprehin tronditjen e tyre të thellë dhe e dënojnë ashpër këtë gjest dhune vdekjeprurëse. Bëhet fjalë, shkruajnë në komunikatë, për dhunimin e karakterit të shenjtë të jetës njerëzore, për atentat kundër së drejtës dhe lirisë së anëtarëve të të gjitha feve për t’u mbledhur e për t’u lutur sipas bindjeve të tyre më të thella. Një plagë e re, që i hapet paqes, rendit dhe qetësisë së vendit tonë dhe bashkësisë së tij si dhe dhunim i një mjedisi lutjeje dhe adhurimi.
Lutja e katolikëve kanadezë
Ipeshkvijtë kanadezë bashkohen me Papën Françesku dhe me kardinalin Gérald Cyprien Lacroix, kryeipeshkëv i Quebec e primat i Kanadasë, për t’u paraqitur viktimave, familjeve dhe miqve të tyre, ngushëllimet e lutjes edhe të katolikëve kanadezë: “Si njerëz të fesë, lutemi sinqerisht për shpirtin e viktimave si dhe për ngushëllimin e paqen e shpirtit të atyre, që qajnë për të dashurit e vdekur”.
Shumë famulli mikpresin sirianë të fesë myslimane
Kjo masakër godet në mënyrë brutale shoqërinë tonë – pohon imzot Lionel Gendron, ipeshkëv i Saint-Jean-Longueuil(Quebec) – që besonte se ishte i mbrojtur nga rreziqe të tilla. Prej muajsh - shton prelati - shumë bashkësi, ndërmjet të cilave edhe shumë famulli, po mikpresin me gëzim një mori refugjatësh, posaçërisht sirianë, e shumica, myslimanë. Myslimanëve u duket sikur kanë arritur në Parajsë. Tani - përfundon - frika krijon rrezikun të ngadalësohet kjo mikpritje.
All the contents on this site are copyrighted ©. |