2016-05-25 15:58:00

Të qoftë dheu i lehtë imzot Lucjan Avgustini


Lotët e mallëngjimi shoqëruan sot funeralin e ipeshkvit të ndjerë të Sapës, imzot Lucjan Avgustinit. Të bindur në fjalën e Ungjillit, se Zoti është bariu ynë e asgjë nuk mungon kur Ai i Lumi është i pranishëm në zemrat tona, besimtarët, meshtarët, rregulltarët e autoritetet nga të gjitha trevat shqiptare mbushën plot katedralen e Nënë Terezës në Vaun e Dejës, ku që sot, prehet në paqe trupi i ipeshkvit, i cili ndërroi jetë të dielën e kaluar. Të gjithë e falenderuan Zotin për dëshminë e tij, gjatë 53 vjetëve të jetës; të gjithë uruan që dheu të jetë i lehtë sipër trupit të tij të vdekshëm e të prehet në paqen e amshimit; të gjithë morën pjesë të mallëngjyer në meshë, të bindur në shpresën e krishterë se shpirti rron e është pranë Atit Qiellor nga ku lutet për të gjithë. Mesha u kryesua nga kryeipeshkvi metropolit i Shkodër-Pultit, imzot Angelo Massafra, ndërsa homelia u mbajt nga ipeshkvi i Kosovës, imzot Dodë Gjergji. Të dëgjojmë informacionin e bashkëpunëtores sonë Violeta Marashi…

"Pas tre ditë homazhesh, në këtë të mërkurë të datës 25 maj 2016, Ipeshkvia e Sapës, i dha lamtumirën e fundit bariut të saj, Imzot Lucjan Avgustinit. Mesha e dritës u mbajt në Katedralen Nënë Tereza në Vau-Dejës, udhëhequr nga Kryetari i Konferencës Ipeshkvore të Shqipërisë, Imzot Angelo Massafra. Përveç popullit të Zotit që kishte stërmbushur Katedralen dhe ambjentet e jashtme të saj, nderuan me praninë e tyre, Nunci Apostolik në Shqipëri, Imzot Romiro Moliner Ingles, e gjithë hierarkia e Kishës Katolike në Shqipëri, Meshtarët dhe Motrat e nderit të Shqipërisë, Kosovës dhe Malit të Zi.

Gjithashtu në këtë përcjellje të fundit, nderuan Presidenti i Republikës së Shqipërisë, z. Bujar Nishani, ish kryeministri, z. Sali Berisha, krerë të institucioneve të larta shtetërore, diplomatike edhe krerët e besimeve të tjera fetare.

Në predikimin e rastit, Imzot Dodë Gjergji, ipeshkvi i Kosovës e njëkohësisht shoku i jetës së tij dhe vëllau në Krishtin, theksoi se 'ndërsa i japim lamtumirën e fundit, shumë të dashurit dhe kurrë të harruarit, ipeshkvit të Sapës, pinjollit të familjes Avgustini, mikut tonë, Imzot Lucjan Avgustinit, të cilin Zoti deshi ta thërrasë te vetja, dhe ndërsa jemi të trishtuar e pranojmë vullnesën e Zotit,  jam shumë i bindur se ai gëzon në lumturine e qiellit paqen dhe lumturinë e amshuar. Hyji e paska përgatitë për amshim; vullneti i Tij paska qenë që ta lartësojë në fronin e shenjtërve dhe në shoqërinë e ëngjëjve të vet', nënvizoi Imzot Gjergji.

Vikari Gjeneral i Sapës Dom Simon Kulli, që pati fatin të ndante 10 vite të jetës së tij, shpalosi fjalët e dalura prej zemrës për figurën e ndritur dhe të lavdishme të Atit shpirtëror dhe bariut të kësaj grigje, duke theksuar se 'Kisha humbi një Bari, Kombi humbi një zë, familjarët humbën një bir dhe vëlla, dioqeza jonë e Sapës humbi një prind, një babë. Por në qiell, jemi të sigurtë se kemi një ndërmjetësues të vazhdueshëm'".

 

Në këto momente vuajtje dhe pikëllimi, edhe Ati i Shenjtë Papa Françesku ka shprehur afërsinë e tij shpirtërore me familjarët, me presbiterin dhe me të gjithë besimtarët nëpërmjet një mesazhi ngushëllues, në të cilin thuhet: “ Duke kujtuar shërbesën kishtare bujare të bariut të denjë, Shenjtëria e Tij i lutet Zotit për shpërblimin e amshuar që u është premtuar shërbëtorëve besnikë të Ungjillit dhe i kërkon së lumes Virgjër Mari të ndërmjetësojë për të marrë prej Zotit ngushëllimin e krishterë për të gjithë ata që qajnë Ipeshkvin e ndjerë. Me këto ndjenja, Ati i Shenjtë i jep nga zemra mbarë bashkësisë dioqezane bekimin Apostolik.

 

Bashkë me dhimbjen, kleri dhe gjithë asambleja kishtare lartësuan lutjet kah Zoti duke shoqëruar trupin e pa jetë të Imzot Lucjanit për në banesën e fundit, në kriptën e Katedrales së Nënë Terezes. 
                                                                                                                      Violeta Marashi








All the contents on this site are copyrighted ©.