Më 1 shtator, në Bazilikën e Shën Pjetrit në Vatikan, Papa Françesku do të kryesojë
një Liturgji të Fjalës Hyjnore, me rastin e Ditës I Botërore të lutjes për kujdesin
e krijimit. Kjo ditë është themeluar nga vet Papa Bergoglio korrikun e kaluar pas
botimit të Enciklikës “Lëvduar qofsh’”.
“Me ipeshkvijë, meshtarë, rregulltarë e besimtarë laikë të Kuries Romake, do të gjendemi
së bashku në Bazilikën e Shën Pjetrit në ora 17.00, për Liturgjinë e Fjalës, në të
cilën, që tani, ftoj të marrin pjesë të gjithë romakët, e të gjithë shtegtarët dhe
ata që dëshirojnë”, tha Papa Françesku në përfundim të Audiencës së sotme të Përgjithshme,
mbajtur në Sheshin e Vatikanit.
“Në Bashkim urate me vëllezërit tanë ortodoksë e me të gjithë njerëzit vullnet mirë,
duam të ofrojmë – shpjegoi Ati i Shenjtë Bergoglio – kontributin tonë për kapërcimin
e krizës ekologjike që po përjeton njerëzimi.
Në mbarë botën, realitete të ndryshme kishtare kanë programuar nisma të përshtatshme
të lutjes e reflektimit, për ta bërë këtë Ditë një moment të fortë edhe në kuadrin
e ndërmarrjes së një stili të ndershëm jetese”.
All the contents on this site are copyrighted ©. |