2015-05-29 17:35:00

Prishtinë: liderët fetarë, jo dhunës e vrasjeve në emër të Zotit


Në Prishtinë vijon konferenca ndërfetare mbi “Dialogun ndërmjet feve, në kohën e mediave sociale” organizuar nga qeveria kosovare në bashkëpunim me komunitetet fetare të vendit. Mëse 200 pjesëmarrës debatojnë rreth sfidave që vijnë nga ekstremizmit fetare përmes internetit e kundërpërgjigjet që shoqëria bashkë me komunitetet fetare duhet të japë. Më hollësisht nga Prishtina të ndjekim shërbimin e Rabie Ibrajt.....

Kosova nuk duhet të lejojë që ideologjitë ekstremiste të rrezikojnë tolerancën dhe mirëkuptimin ndërfetar, është thënë sot në Konferencën Ndërkombëtare Ndërfetare që po mbahet në Prishtinë.
Kjo është konferenca e katërt e këtij lloji, ku po marrin pjesë përfaqësues të feve dhe institucioneve, si dhe përfaqësues ndërkombëtarë. 
Presidentja e Kosovës, Atifete Jahjaga, e cila ishte mysafire e posaçme e kësaj konference, tha se toleranca, bashkëjetesa dhe mirëkuptimi duhet të jenë vlera të shoqërisë në Kosovë.
Ajo i kushtoi rëndësi sidomos ruajtjes së rinisë nga tendencat ekstremiste, që shpesh provohen të infiltrohen përmes religjioneve. 
"Ne duhet të konfrontohemi me ekstremizmat e çfarëdo lloji dhe me ndikimet që ata mund të kenë mbi të rinjtë tanë. Prandaj, nevojitet angazhimi ynë i plotë, i shoqërive tona, në hapjen e perspektivave për të rinjtë, në ngritjen e nivelit të arsimimit dhe në kultivimin e kulturës së bashkëjetesës. Religjioni është pikërisht këtu për të ndihmuar këtë angazhim për një të ardhme më të mirë", tha Jahjaga. 
Ndërkaq, Ejup Ramadani, shef i kabinetit të kryetarit të Bashkësisë Islame të Kosovës, myftiut Naim Tërnava, theksoi se liria e besimit dhe manifestimi i tij janë një vlerë globale, sikurse arsimimi dhe edukimi që nuk kanë alternativë.
Ai kërkoi që indoktrinimi i të rinjve duhet të demaskohet në mënyrë që njerëzit të jenë të lirë në kultivimin e religjionit. 
"Ne jemi një vend i vogël e me një të kaluar të hidhur. Por, edhe ajo e kaluar na e kujton një vlerë të çmuar e të rrallë, që ne me krenari e bartëm brez pas brezi, e ajo është harmonia ndërfetare. Por, sot jemi në rrethana të reja, në sfida të reja, shpesh edhe të padëgjuara më parë. Feja si pjesë e kulturës së shoqërisë ofron përkrahje në përballjen me këto sfida që mund ta rrezikojnë gjithë atë që është arritur deri më sot", tha Ramadani. 
Me mesazhe për tolerancë e bashkëjetesë është prezantuar në fjalimin e tij edhe përfaqësuesi i kishës ortodokse serbe në Kosovë, igumeni Sava Janjiq.
Ai tha se shumetniciteti dhe diversiteti fetar në Kosovë duhet të shihen si pasuri dhe jo si pengesë.  "Shoqëria, e cila di se si t'i respektojë dallimet dhe, në të njëjtën kohë, është gjithëpërfshirëse për të gjithë qytetarët e saj, dëshmon se është e pjekur politikisht", tha Janjiq. Kurse, e kundërta e kësaj, sipas tij, rrezikon që ta mbajë Ballkanin Perëndimor të izoluar dhe në konflikt.
Vikari i Përgjithshëm i Kishës katolike të Kosovës, Dom Lush Gjergji, citoi me këtë rast një thënie të Papa Shën Gjon Palit të Dytë, ku flitet për aspektet e krimeve që njerëzit mund t'i kryejnë duke u thirrur padrejtësisht në Zotin. "Urrejtja dhe vrasja e njeriut është krim. E krimi i krimeve është kur ajo bëhet në emër të Zotit", tha Dom Lush Gjergji. 
Një përfundim i përbashkët i përfaqësuesve fetarë ishte se kjo pjesë e Evropës, sikurse edhe pjesët tjera në mbarë botën, po ballafaqohen edhe me ide ekstremiste, të cilat mundohen t’i përdorin fetë për qëllimet e tyre politike e shumëçka tjetër. 
Konferenca do t'i vazhdojë punimet edhe në dy ditët në vijim.
Qëllimi i saj pritet të jetë adresimi i mesazheve në kohën kur ekstremizmi fetar po shënon rritje dhe është shndërruar në një problem global.
Kurse, sa i përket Kosovës, është thënë se është me rëndësi të nënvizohet se toleranca dhe mirëbesimi janë kultivuar për shumë kohë, dhe se të rinjtë, nga ky vend, nuk duhet lejuar të indoktrinohen e të përfshihen në luftërat në Siri e Irak, në krahë të atyre që promovojnë ekstremizmin fetar dhe si mjet zgjedhin edhe terrorizmin. (nga QIK-ut)








All the contents on this site are copyrighted ©.