Kemi filluar muajin e majit, të cilin, Kisha katolike ia kushton nderimit të Zojës
së Bekuar, Virgjërës Mari dhe lutjeve drejtuar Hyjit përmes ndërmjetësimit të Saj
amnor . Kështu, kur thuhet maj, mendja të shkon menjëherë te Zoja e Bekuar. Maji është
muaji që i kushtohet Zojës, është koha e bashkimit më të ngushtë me Nënën dhe ne të
gjithëve, e cila na prin tek Jezu Krishti.
Muaji i majit, vetvetiu, i është kushtuar Zojës, sepse është muaji i bukurisë, muaji
i shpërthimit të jetës e asnjë krijesë nuk është më e bukur se Maria; asnjë krijesë
nuk i ka kënduar jetës si Maria. Prandaj muaji i majit është muaj marian.
E muaji maj ka disa elemente kryesore që karakterizojnë. Besojmë se çasti më i rëndësishëm
i muajit maj duhet të jetë ai i rizbulimit të lutjes mariane e posaçërisht i thënies
së uratës së Rruzares në gjirin e familjes, në shtëpi. Mund të themi se dikur urata
e Rruzarjes Shenjte ishte një element i domosdoshëm për jetën e përditshme të familjes
së krishterë. Familja e krishterë shqiptare e ka traditë të mblidhet çdo mbrëmje për
të thënë së bashku Rruzaren Shenjte. Kur nuk kishte televizor, internet, madje as
dritë; gjithsesi nën dritën e kandilit (që ndizet shpesh herë edhe sot) familja ndjehej
mrekullisht e lume dhe e bashkuar. Sa binte muzgu, këmbanat e Kishës këndonin Ave
Marinë – Të Falem Mari, e familjet ishin përplot me Zotin, në sa luteshin së bashku
me Zojën e Bekuar. Çka i pengon të mblidhen edhe sot e ta thonë së bashku Rruzaren?
Kisha na fton të gjithëve që gjatë këtij muaji ta lusim sa më shpesh e më mirë
uratën e Rruzares Shenjte. Për ta thënë mirë Rruzaren është e nevojshme që në shtëpi
të ndjehet atmosfera e lutjes. Lutja nuk vjen vetvetiu. Në se në familje e në shtëpi
ndjehet fryma e fesë, është e lehtë të krijohen kushtet e nevojshme për të thënë me
gjithë zemër Rruzaren. Para së gjithash duhet që të mblidhen të gjithë anëtarët e
familjes së bashku, babai, nëna, bijtë e bijat e në se janë, edhe gjyshi e gjyshja,
sepse Rruzarja është e bukur, kur e thotë gjithë familja së bashku, kur Zotit i luten
të gjithë një zëri. Duke thënë së bashku Rruzaren, ndjehet zëri i popullit të Zotit,
familja bëhet një gjë e vetme me të, ndjen misterin e Jezusit të pranishëm në mes
të atyre që janë mbledhur në emër të Tij.
E duhet të kujtojmë edhe faktin se si lindi devocioni për Zojën e Bekuar! Devocioni
për Zojën e Bekuar lind nga vetë historia e shëlbimit, është vepër e vetë Zotit. Shën
Luka ungjilltar i paraprin tregimit mbi Lajmërimin e Zojës me disa fjalë, që kanë
një kuptim jashtëzakonisht vendimtar. Thotë Ungjilltari: “Engjëlli Gabriel qe dërguar
nga Zoti në një qytet të Galilesë, të quajtur Nazaret, tek një virgjër me emrin Mari”.
Kjo shtesë ka rëndësi vendimtare: na tregon se është Zoti ai që e dërgoi Engjëllin.
Prej këndej, edhe se është Zoti ai që e zgjodhi Marinë. Ishte Zoti ai që trokiste
te porta e zemrës së Marisë; kjo portë u hap dy kanatash përpara Hyjit e që atë çast
Maria u bë bashkëpunëtorja më e madhe në planin e shëlbimit. Maria është vazhdimisht
pranë Jezusit, nuk ndahet kurrë nga ai. Në se ndahet Biri nga Nëna ose Nëna nga Biri,
bëhet diçka që është kundër zgjedhjes së Zotit. Prandaj themi se Maria na merr për
dore e na çon te Krishti.
All the contents on this site are copyrighted ©. |