Afrika Jugore: ipeshkvijtë nderojnë kujtimin e misionarëve të vdekur
“Burra e gra, që ia kushtuan gjithë jetën Zotit e të afërmit, themeluan Kishën vendase
në dioqezat tona e në shumë nga famullitë tona, duke e vënë gjithë jetën në shërbim
të njerëzve të të gjitha tipeve e në të gjitha mënyrat”- pohojnë, në Letrën e tyre
Baritore kushtuar Vitit të Jetës Rregulltare, ipeshkvijtë e Konferencës ipeshkvnore
jugafrikane, në të cilën bëjnë pjesë ipeshkvijtë e Afrikës Jugore, të Swazilandit
e të Botswan-ës. Peng nderimi për misionarët, që pushojnë në paqe në tokat e
misionit “Është peng nderimi, kujtimi i rregulltarëve të vdekur, pasi i shërbyen
gjithë jetën viseve tona e pushojnë në paqe trojeve tona. Shpesh, në varre të panjohura,
ose të harruara. I vlerësojmë lart këta rregulltarë, që erdhën këtu në lule të rinisë,
e u plakën e vdiqën ndër ne, pas një jete shembullore, gjatë së cilës dhanë dëshmi
të ndritura në ndjekjen e Krishtit”, vijon dokumenti, botuar nga agjencia Fides. Pasuria
e rregulltarëve në të katër anët e botës Ipeshkvijtë, pasi kujtojnë se misioni
ungjillëzues është detyrë e çdo njeriu, i cili ia kushton gjithë jetën Zotit e robit,
nënvizojnë pasurinë që buron nga prania e rregulltarëve e rregulltareve të ardhur
nga të katër anët e botës. “Dëshmia e dhënë nga jetë me përmasa ndërkombëtare e shumëkulturore,
është mburojë kundër nacionalizmit të tepruar. Shembulli konkret i kujdesit për tjetrin,
duke kapërcyer kufijtë e moshës e të kulturave të ndryshme e i dëgjimit me respekt
të tjetrit, i inkurajon të gjithë të jetojnë sipas Ungjillit, duke i ndihmuar t’ia
hapin zemrën misterit të Hyjit, që e kanë në shpirt”. “Ia besojmë vëllezërit e
motrat tona të kushtuara, në mënyrë të posaçme, lutjeve e dashurisë së Nënës sonë,
Zojës së Bekuar, duke uruar që ajo ta ndajë bashkë me ta e edhe me ne, dashurinë,
që u pati dhënë guxim ta dhurojnë çdo ditë të jetës së tyre për Krishtin e të bashkëpunojnë
me Të për shëlbimin e botës”, përfundojnë ipeshkvijtë.