Tenda, karrige me qera, tryeza në vend të elterit: kështu ishin kishat dje në Niamey
të Nigerit, ku më 16 e 17 janar famullitë katolike e protestante u vunë në shënjestër
të protestuesve kundër karikaturave të publikuara nga e përjavshmja franceze “Charlie
Hebdo”, pas masakrës së Parisit. Mesha u kremtua pa paramente, sepse veshjet e meshtarëve
u dogjën së bashku me ndërtesat. Plot shpresë në të ardhmen, gjatë gjithë javëssë
kaluar, besimtarët u munduan t’i pastronin dhe t’i rregullonin njëfarësoj kishat e
djegura. Dëmet arrijnë në 2 milion euro, por të krishterët kanë vendosur të japin
një pjesë të pagave të tyre për rindërtimin e vendeve të kultit. Ndokush do të japë
materiale, të tjerë kanë vënë në dispozicion krahun e punës. Të enjten, besimtarët
janë mbledhur në lutje para shtatores së Zojës, që së bashku me pak objekte gjetur
aty-këtu, ka shpëtuar nga djegia. Ipeshkvi i Niamey-t u kërkoi të gjithëve t’ia ofrojnë
shën Marisë vuajtjet dhe shpresat e tyre përmes aktit simbolik të vendosjes së hirit
të çdo kishe në këmbët e Zojës. Por prelati nuk harroi të flasë edhe për falje e mirëdashje
ndaj myslimanëve, duke i nxitur të krishterët të bëjnë çdo përpjekje për të ushqyer
dialogun me bashkësinë islame. “Ç’ndodhi – nënvizoi ipeshkvi – nuk është fryt i dialogut”,
përkundrazi. Ai i ftoi besimtarët të forcojnë lidhjet miqësore e vëllazërore me myslimanët.