Papa gjykatës Rota Romana: të shqyrtohet vullneti martesor

Papa Françesku priti sot anëtarët e Gjykatës Rota Romana, në ditën e përurimit të Vitit gjyqësor. Gjykatësi, pohoi Papa, nësa peshon vlefshmërinë e miratimit, shprehur nga bashkëshortët, duhet të ketë parasysh kontekstin e vlerave e të fesë, në të cilat u formua martesa, ose të mangësive a të mungesës së tyre. E nxiti, prandaj Gjykatën për thellimin e angazhimit në të mirë të shumë çifteve, që i drejtohen Kishës për të hedhur dritë mbi situatën e tyre martesore, duke uruar që gjithnjë më shumë raste të zgjidhen falas.

Papa shfrytëzoi rastin për të ofruar një reflektim mbi kontekstin njerëzor e kulturor, në të cilin lidhen sot shumë martesa. Kriza e vlerave nuk është, sigurisht, fenomen i kohëve të fundit, pohoi Françesku. Edhe Pali VI pati folur për sëmundjen e njeriut modern, që e ka humbur perspektivën e fesë:
“Në të vërtetë, vijoi Françesku, braktisja e perspektivës së fesë çon në mënyrë të pashmangshme në njohjen e rreme të martesës, gjë që nuk mbetet pa pasoja në pjekurinë e vullnetit për jetë bashkëshortore”.
Përvoja baritore, vijoi Françesku, na mëson se jemi para një numri të madh besimtarësh në gjendje të parregullt, gjë që ndikon fuqimisht në përhapjen e mendësisë, që të shtyn të kërkosh , në vend të lumnisë së Zotit, mirëqenien personale.
Një gabim i tillë nuk minon vetëm qëndrueshmërinë e martesës, natyrën e saj të pazgjidhshme e lindjen e fëmijëve, por i shtyn bashkëshortët të mendojnë deri për përfundimin e bashkimit, nëse nuk realizohen dëshirat që priteshin prej tij. Papa iu drejtua gjykatësve me fjalët:
“Dëshiroj t’ju nxis për një angazhim plot pasion e gjithnjë në rritje në shërbesën tuaj, për mbrojtjen e unitetit të jurisprudencës në Kishë. Sa punë baritore për të mirën e shumë çifteve e fëmijëve, shpesh viktima të këtyre ngjarjeve! Edhe këtu ndjehet nevoja për kthesë baritore të strukturave kishtare (cfr ibid.,27) për t’u ofruar opus iustitiae atyre, që i drejtohen Kishës për të ndriçuar gjendjen e tyre bashkëshortore”.
Nuk duhet mbyllur shëlbimi i njerëzve brenda shtigjeve të ngushta të juridicizmit, por duke shmangur sofizmat larg jetës së njerëzve në vështirësi, duhet arritur tek e vërteta në çastin konsensual, është porosia e Françeskut.
Së fundi, një e dhënë pozitive, që Papa e kujtoi duke folur lirisht: një numër i ndjeshëm çështjesh pranë Rota Romana janë ndjekur falas, për ata që jetojnë në kushte të vështira ekonomike e, prej këndej, nuk mund të paguajnë një avokat.