Kardinali Parolin: Papa, shumë i qartë kundër terrorizmit
“Papa Françesku është shumë i ashpër në dënimin e terrorizmit e të manipulimit të
fesë me qëllim dhunën. Mbi këtë pikë, nuk mund të ketë pasiguri, ose keqkuptime”.
Kështu pohon Sekretari i Shtetit, kardinali Pietro Parolin, në një intervistë me “L’Osservatore
Romano”, në përfundim të udhëtimit të Papës në Sri Lankë e Filipine. “Përveç kësaj
– shton ai – u ka kërkuar vazhdimisht krerëve myslimanë, sidomos gjatë kësaj periudhe
kohe, të prononcohen haptas kundër manipulimeve e të vënë në dukje fytyrën tolerante,
paqësore dhe plot respekt të Islamit”. “Në sintoni të plotë me magjisterin e tij e
përmes shumë kanaleve, kështu kanë bërë edhe bashkëpunëtoret e tij”, vë në dukje kardinali
Parolin, i cili nënvizon se ka nga ata, që nuk janë dakord me linjën e dialogut e
do të dëshironin qëndrime më të ashpra. “Por Papa është shumë i qartë – sqaron – për
të luftuar fundamentalizmin e pasojat e tij duhet të dialogojmë, t’ia hapim zemrën
njëri-tjetrit, të takohemi”. “Në avion – tregon më tej Sekretari i Shtetit të
Vatikanit – po reflektoja mbi këto çështje jo të lehta, kur në librin e lutjeve të
ditës lexova këtë mendim të shën Injacit të Antiokisë: paqja çarmatos armiqtë materialë
e shpirtërorë. Ndoshta kjo është përgjigjja për të gjithë ata, që pyesin veten e na
pyesin nëse dialogu është kohë e humbur. Rezultatet nuk shihen menjëherë, por, me
Papën, jam i bindur se kjo është udha e drejtë. Lutem që Zoti t’i shndrisë e t’u japë
forcë, guxim e durim për ta përshkuar deri në fund”.