Ekspozitë e artistit Forstner në Katedralen ‘Nënë Tereza’
Në Katedralen katolike ‘Nënë Tereza’ në Prishtinë vijojnë aktivitetet kulturore. Kështu
më 19 janar, u shënua një ngjarje tjetër kulturore, hapja e ekspozitës së artistit
austriak, Leopol Forstne kushtuar kulturës, traditave e vlerave të popujve në Ballkan.
Ipeshkvi i vendit, shkëlqesia e tij imzot Dodë Gjergji ishte mikpritës i mbrëmjes
së hapjes zyrtare të kësaj ekspozite. Të pranishëm, ministri i Punëve të Jashtme të
Austrisë, Sebastian Kurz, Presidentja e Kosovës, Atifete Jahjaga, kryeparlamentari
i Kosovës, Kadri Veseli, ministri i Punëve të Brendshme, Skënder Hyseni, zëvendësministri
i Punëve të Jashtme, Petrit Selimi, kryetari i Bashkësisë Islame, myftiu Naim Tërnava,
Peshkopi i Dioqezës Rashkë-Prizren, Teodosije, ambasadorë të tjerë në Kosovë, struktura
të ndryshme ndërkombëtare e vendore, meshtarë e motra, si dhe qytetarë të shumtë.
Ipeshkvi imzot Dodë Gjergji, pasi i përshëndeti të pranishmit, tha se, shumë kush
mund të pyet se pse ekspozita po hapet në Katedrale. ‘Them se kjo nuk na pengon, sepse
ekspozita bartë në vete domethënie të forte, në punime po e vërejmë kulturën, traditën
e vlerat e popujve në Ballkan, përfshirë edhe vlerat kulturore e fetare të popullit
tone, të cilat na i ka prezantuar autori Leopol’, tha Ipeshkvi. Por, hapja e kësaj
ekspozite ishte më shumë se kaq, ajo vuri në lëvizje personalitete me ndikim për të
përquar mesazhe paqeje, pikërisht tek e Shenjta e Kombit, Pajtorja e Katedrales, e
Lumja Nënë Terezë. Presidentja e Kosovës, Atifete Jahjaga, pasi foli për rëndësinë
e ekspozitës, tregoi se kohë më pare një personalitet ndërkombëtar i ka kërkuar asaj
të sqaroj se ne si Kosovë çka kuptojmë me konceptin e Evropës. “E kuptojmë se e ardhmja
e juaj është në Evropë, por në cilën Evropë”? e ka pyetur ai. Sonte tha presidentja
do të mundohem t’i jap kuptim kësaj pyetje. ‘Evropa të cilës ne duam t’i përkasim
është Evropa e vlerave dhe unitetit, Evropa e diversitetit dhe multikulturalizmit,
Evropa e përparimit. Është Evropa e cila përfaqësonte shpresë për miliona njerëz prapa
perdes së çeliktë- ku edhe të ëndërrosh nuk ishte e lejuar. Për miliona të tjerë që
janë të gatshëm të anashkalojnë urrejtjen e rrënjosur thellë dhe fatet tragjike që
të bashkohen, jo për shkak të tokës dhe gjakut, por për shkak të ideve të cilat e
kanë definuar kohën në të cilën ne jetojmë”, tha ajo. Pas ekspozitës, në Rezidencën
e Ipeshkvisë është mbajtur takim pa praninë e gazetarëve. Por, Presidentja në rrjetin
social Facebook, ka shkruar "Në bisedë me liderët fetarë theksuam se vlerat e shoqërisë
tonë si shtet sekular, janë kultivimi i vazhdueshëm i tolerancës ndërfetare dhe bashkëjetesa
ndërmjet religjioneve të ndryshme në Kosovë’.