Egjipt - Krishtlindje e blinduar për ortodoksët koptë
Krishtlindje e blinduar në Egjipt, për Kishën kopto-ortodokse. Ndërsa në Libi u liruan
13 nga 20 të krishterët, që ishin në duart e islamistëve. Filluan në mesnatë,
kremtimet për Krishlindjen në Kishën kopto–ortodokse, e para për numër besimtarësh
në Lindjen e Mesme. Qeveria egjiptiane mobilizoi një numër të madh forcash, nga frika
e atentateve. E megjithatë, festa nuk kaloi pa gjak: dje në mëngjes dy policë, roje
në një kishë katolike, u vranë nga disa të panjohur, në qytetin Minya, i mirënjohur
për fërkime ndërmjet të krishterëve, që përfaqësojnë më se gjysmën e popullsisë, e
islamistëve. Lajme të mira, ndërkaq, nga Libia, ku burimet qeveritare zyrtare
konfirmuan mbrëmë lirimin e 13 të krishterëve koptë egjiptianë, të rrëmbyer të shtunën
e kaluar në Sirte, për arsye të panjohura. Ndërsa për shtatë të krishterët e tjerë
koptë, në duart e islamistëve libikë, nuk ka asnjë lajm. Në Kairo, Mesha e mesnatës
së Krishtlindjes u kremtua rregullisht e pa aksidente, ndërsa në katedralen kopto-ortodokse
të Shën Markut, presidenti egjiptian Abdel al-Fatah al Sisi i çuditi besimtarët, që
e panë papritmas duke hyrë në Kishë. Në vijim, një çudi tjetër: presidenti përshëndeti
Patriarkun Tawadros II dhe foli me të krishterët e pranishëm, duke nënvizuar unitetin
e popullit egjiptian.