E diel 21 dhjetor, Kisha katolike kremton të dielën e 4-të e të fundit të Kohës
së Ardhjes, e po sot më 19 dhjetor kalendari përkujton Shën Pjetër Kanizi, meshtar
jezuit e doktor i Kishës dhe e Shën Mikea Profet. Nisi, kështu, një nga javët më gazmore
të vitit, që i afrohet fundit plot vezullime, premtime e shpresa. Zoti vjen rishtas
mes nesh, për të na rinuar ne e botën! Liturgjia e ditës na sjell këtë reflektim:
Krishti është shëlbuesi i vërtetë i njerëzimit e Maria ua dhuroi të gjithë atyre njerëzve
që duan e dinë ta presin në zemër.
Të hënën më 22 dhjetor, kalendari përkujton
festën e Shën Françeska Kabrinit, virgjër, themeluese e misionareve të Zemrës
së Krishtit. Liturgjia e së kremtes së saj na kujton se Zoti vijon të bëjë mrekulli
gjithnjë e për të gjithë, por njeriu i përvujtë është i aftë ta pranojë dhuratën e
Hyjit. Të martën më 23 dhjetor, përkujtohet shën Gjoni i Ketit. Ai me
jetën dhe misionin e tij, na kujton se në rrjedhë shekujsh nuk kanë munguar kurrë
lajmëtarët e Zotit, që na ndihmojnë ta njohim më thellë e ta jetojmë më përkushtueshëm
fenë tonë. E dita e sotme na kujton edhe se, pas shtegtimit liturgjik njëvjeçar, jemi
shumë pranë cakut: “Ta çojmë kokën lart, shpëtimi ynë është fare pranë!”.
Të
mërkurën më 24 dhjetor, bie Nata e Madhe e Krishtlindjes. Në këtë ditë, kur
kalendari Kishtar përkujton edhe festën liturgjike të Shenjtoreve Tarsila e Irma,
dëgjojmë sërish profecitë mesianike për Jezusin e falënderojmë Zotin, që vjen përsëri
mes nesh. Hyji deshi të bëhej njeri, duke hyrë në historinë konkrete të njerëzimit.
Gjenealogjia e gjatë e fisit të Jozefit na dëshmon se Jezusi Zot i përket popullit
hebraik e mbarë njerëzimit. Me 24 dhjetor kremtojmë lindjen e Foshnjës Hyjnore
në Betlehem, kremtojmë festën kur Krishti fëmijë rilind në zemrat e njerëzve,
në zemrat e atyre që besojnë e të atyre që nuk besojnë, sepse Zoti vjen në botë për
të gjithë, duke u sjellë si dhuratë vetveten.
Të enjten më 25 dhjetor, do
të kremtojmë Lindjen e Zotit tonë Jezu Krishtit. Është Dita e Madhe e Krishtlindjes,
Dita e festës së Mishërimit të Zotit kur gjithçka nis përtëritjen; errësira bëhet
dritë e Engjëjt mbi Shpellën e Betlehemit këndojnë: “Lumni Zotit në qiej të larta
e paqen në tokë njerëzve, që ai i do!”, ndërsa besimtarët rijetojnë mrekullinë e Betlehemit
në Meshët e Mesnatës e të Ditës së Lindjes së Shelbuesit të botës, Jezu Krishtit Zot. Të
premten më 26 dhjetor, Më 26 dhjetor përkujtohet Shën Stefani, martiri
i parë i Kishës. Ja çfarë shkruante për festën e tij Shën Fulgjenci i Ruspes: “Dje
kremtuam lindjen në kohë të Mbretit tonë të amshuar, sot kremtojmë mundimin ngadhënjimtar
të ushtarit. Dje, mbreti ynë, i veshur me trup njerëzor e duke dalë nga prehri i Virgjërës,
denjoi të vizitojë botën; sot, ushtari, duke dalë nga tenda e trupit, hyri ngadhënjimtar
në qiell”.
Të shtunën më 27 dhjetor, kalendari kujton Shën Gjonin ungjilltar.
Biri i Zebedeut, vëllai i Jakobit, nxënësi i Gjon Pagëzuesit, është ndër të parët
ndjekës të Jezusit. Është dishepulli i dashur, që, në darkën e fundit, vuri kryet
në kraharorin e Jezusit. Dëshmitar i shndërrimit dhe i agonisë së Zotit, është i pranishëm
tek këmbët e kryqit, ku Jezusi i besoi Nënën e vet. Bashkë me Pjetrin pa varrin e
zbrazët të Krishtit dhe besoi në ringjalljen e Zotit.
Të dielën e ardhshme
më 28 dhjetor, Kisha kremton solemnitetin e Familjes Shenjte –
që në traditë njihet si ‘Konaku Shenjt’. Po më 28 dhjetor kalendari shënon kujtimin
e martirëve të pafajshëm. Fëmijët e vrarë nga Herodi mbret i japin dëshmi Krishtit
jo me fjalë, por me gjak. Ata na kujtojnë se martirizimi është dhuratë e Zotit. Kujtojmë
se Viti 2014 numëron ditët e fundit. Duke biseduar me ju, të dashur dëgjues, ndërmjet
dy festave të mëdha të fundvitit, nuk mund të mos e mbyllim këtë faqe të parafundit
të Kalendarit 2014, me urimin: “Për shumë vjet Krishtlindjen e Gëzuar Vitin
e Ri!”