Papa, luteranëve: të mos ndahemi për tematikat e jetës e të familjes
Nuk duhet të heshtim për çështjet, që kanë të bëjnë me dinjitetin e njeriut, në mënyrë
që të mos cënohet konsensusi ekumenik i arritur deri tani. Ky ishte mendimi i shprehur
sot nga Papa Françesku, në audiencën me delegacionin e Kishës Ungjillore Luterane
gjermane: “Me aktualitet
të jashtëzakonshëm janë çështjet e lidhura me dinjitetin e njeriut në fillim e në
fund të jetës së tij, po ashtu, ato që kanë të bëjnë me familjen, me martesën dhe
me seksualitetin, për të cilat nuk mund të heshtim ose t’i lemë mënjanë, vetëm sepse
nuk duam të cënojmë konsensusin ekumenik të arritur deri tani. Do të ishte mëkat nëse
për këto çështje të rëndësishme të ekzistencës njerëzore, do të vëreheshin ndryshime
të reja ndërmjet konfesioneve fetare”. Papa kujtoi se në vitin 2017, të krishterët
luteranë dhe katolikë do të përkujtojnë së bashku 500-vjetorin e Reformës, rast –
nënvizoi Ati i Shenjtë – për dëshminë e fesë së përbashkët në Zotin, Njëni e Trini: “Në
qendër të kësaj ngjarjeje do të jenë lutja dhe kërkesa intime e faljes drejtuar Zotit
tonë Jezu Krishtit për fajet e ndërsjella, së bashku me gëzimin e ecjes në udhën ekumenike
të përbashkët”.