Kthesë historike në marrëdhëniet SHBA Kubë. Papa: përgëzoj megjithë zemër
Njoftim i Sekretarisë së Shtetit të Vatikanit mbi vendimin e Qeverive të SHBA-së e
Kubës për rivendosjen e marrëdhënieve diplomatike “Ati i Shenjtë dëshiron të shpreh
kënaqësinë e tij për vendimin historik të Qeverive të Shteteve të Bashkuara të Amerikës
e të Kubës për rivendosjen e marrëdhënieve diplomatike, me qëllim që të kapërcehen,
në interesin e qytetarëve të të dy palëve, vështirësitë që kanë shënuar historinë
e tyre të kohëve të fundit. Gjatë muajve të fundit, Ati i Shenjtë Françesku i ka shkruar
Presidentit të Republikës së Kubës, SH.T. Zotit Raul Castro, e Presidentit të Shteteve
të Bashkuara, SH.T. Zotit Barack H. Obama, për t’i ftuar t’i zgjidhin çështjet humanitare
me interes të përbashkët, ndër të cilat situatën e disa të burgosurve, me qëllim që
të niset një fazë e re në marrëdhëniet ndërmjet dy Palëve. Selia e Shenjtë, duke pritur,
në muajin e tetorit, Delegacionet e dy Vendeve, ka dashur t’i ofroj zyrat e veta të
mira për të favorizuar dialogun pozitiv mbi tema delikate, nga i cili doli zgjidhje
që kënaqi të dy Palët. Selia e Shenjtë vazhdon të sigurojë mbështetjen e saj ndaj
nismës që dy Kombet do të ndërmarrin për përforcimin e marrëdhënieve bilaterale e
favorizimin e mirëqenies së qytetarëve të tyre.