Bie sot 70-vjetori i lindjes së Presidentit historik të Kosovës, Ibrahim Rugova. Sot
më 2 dhjetor, bie 70 vjetori i lindjes së Presidentit historik të Kosovës, dr. Ibrahim
Rugova, vizionarit e arkitektit të lirisë e pavarësisë së Dardanisë së lashtë. Ibrahim
Rugova e frymëzimi i tij në jetën personale, në fushën e veprimtarisë kulturore, politike
e publike. Burimi nga i cili nxirrte e kultivonte vlerat njerëzore e kombëtare, kulturore
e shpirtërore, politike e shoqërore duke qëndruar para së keqes rrugës së paqes drejt
lirisë e pavarësisë së Vendit. Dr. Ibrahim Rugove paraqiti gjendjen e rëndë të
të drejtave njerëzore në Kosovë duke e ndërkombëtarizuar, çojë zërin duke kërkuar
respektimin e dinjitetit të çdo njeriu e të një populli të tërë. I frymëzuar nga
personalitete të mëdha të së kaluarës e të kohës, si ipeshkvi shqiptar imzot Pjetër
Bogdani, Gandhi, Martin L. King, V. Havle, Papa shën Gjon Pali dhe e Lumja Nënë Terezë,
dr. Ibrahim Rugova jetoi e veproi deri në fund për popullin dhe vendin e tij, duke
lënë kështu një trashëgimi të jashtëzakonshme si njeri i kulturës, si kultivues i
paqes e burrë shteti largpamës. Mbi figurën e punën e dr. Ibrahim Rugovës të dëgjojmë
dëshminë e Vikarit të Kishës katolike të Kosovës, dom Lush Gjergjit..........
Dr.
Ibrahim Rugova simbol i rrugës paqësore që solli Pavarësinë Dr. Ibrahim
Rugova lindi në fshatin Cerrcë, komuna e Istogut, në Kosovë, më 10 janar 1945.
Mbas mbarimit të shkollës fillore ai vazhdoi shkollimin e mesëm në Pejë, studimet
e larta i kreu në Prishtinë, në Fakultetin e Filozofisë të Universitetit të Prishtinës.
Pas diplomimit në Degën e Albanologjisë më 1971 ai vazhdoi për një vit në Ecole Pratique
des Hautes Etudes të Parisit studimet akademike në degën e letërsisë. Në vitin 1984
doktoroi në Universitetin e Prishtinës në degën e Letërsisë. Po këtë vit u zgjodh
kryetar i Shoqatës së Shkrimtarëve të Kosovës. Si kryetar i partisë Lidhja Demokratike
e Kosovës u zgjodh më 23 dhjetor 1989, duke kontribuar në shumë ngjarje të rëndësishme
në territorin e Dardanisë, si: Deklarata e Pavarësisë (2 korrik 1990 ), shpallja e
Kosovës Republikë dhe miratimi i Kushtetutës së saj (7 shtator 1990 ), referendumi
popullor për pavarësinë dhe sovranitetin e Kosovës, mbajtur në fund të shtatorit të
vitit 1991, zgjedhjet e para shumëpartiake për Kuvendin e Kosovës dhe zgjedhjet presidenciale
në Republikën e Kosovës më 24 maj 1992. Në zgjedhjet e Kuvendit, i cili përbëhej
nga tri partitë kryesore të Kosovës, fitoi partia e tij, duke u zgjedhur i Kryetar
i Republikës së Kosovës me shumicë votash. Fondacioni Paul Litzer i Danimarkës në
vitin 1995 i dha Ibrahim Rugoves Çmimin për Paqe. Më 1996 zgjidhet anëtar korrespondent
i Akademisë së Arteve dhe të Shkencave të Kosovës dhe shpallet doktor nderi i Universitetit
të Parisit VIII, në Paris. Në zgjedhjet e mbajtura në mars 1998 ai rizgjidhet në poziten
e kryetarit të republikës, dhe po në këtë vit merr Çmimin Saharov nga Parlamentit
Evropian. Gjatë luftës së Kosovës(1999) ai qëndroi në Kosovë, ku u paraburgos
së bashku me familjen e tij nga qeveria e Serbisë, e cila pas disa ditësh keqtrajtimi
psiqik, i lejoi Dr. Rugovës dhe familjes së tij largimin nga Beogradi. Në vitin
1999 shpallet qytetar nderi i qyteteve italiane: Milanos dhe Breshias (Brescia) si
dhe nga qyteti gjerman Mynster (Münster) i jepet Çmimi për Paqe. Mbas luftës kthehet
në Kosovë dhe në zgjedhjet e mbajtura nën mbikqyrjen e komunitetit ndërkombëtar ai
përsëri zgjidhet kryetar i Kosovës. Në vitin 2000 merr Çmimin për Paqe të Unionit
Demokratik të Katalonisë Manuel Carrasco i Formiguera, në Barcelonë. Veprimtaria
letrare e Ibrahim Rugovës ka qënë gjithnjë prezente para angazhimit të tij politik.
Ai ishte si nismë redaktor në gazeten Bota e Re, shkroi në revisten shkencore Dituria
që botoheshin në Prishtinë. Po ashtu punoi si hulumtues i letërsisë në Institutin
Albanologjik të Prishtinës dhe për një kohë ishte kryeredaktor i revistës së këtij
instituti, Gjurmime Albanologjike. Disa nga çmimet dhe titujt ndërkombëtarë :Çmimi
për Paqe - (1995 Fondacioni Paul Litzer në Danimarkë); Doktor Nderi - (1996 Universiteti
i Parisit VIII Sorbonë, Francë); Honourus Causa: Çmimi Saharov - (1998 Parlamentit
Evropian); Çmimin për paqe - (1999 Qyteti Mynster (Münster), Gjermani); Qytetar nderi
i Milanos - (1999 ); Qytetar nderi i Breshias (Brescia) - (1999 ); Çmimin për Paqe
(2000 Unioni Demokratik i Katalonisë - Barcelonë, Spanjë) Manuel Carrasco i Formiguera;
Çmim nderi për paqe nga qyteti i New Yorkut, SHBA (19 Nëntor ) Disa nga botimet
: Prekje lirike - 1971; Kah teoria - 1971; Strategjia e kuptimit - 1980; Vepra e Bogdanit
1675-1685 - 1982; Kahe dhe premisa të kritikës letrare shqiptare 1504-1983; Refuzimi
estetik - 1987; Kritika letrare ( bashkë me Sabri Hamitin) - 1979; Bibliografika e
kritikës letrare shqiptare 44-74 (bashkë me Isak Shemen) - 1976.