Olen Çezari në Romë: “klandestinët” në Auditoriumin “Parku i Muzikës”
Ndoshta pak shqiptarë kanë nevojë t’u kujtojmë kush është Olen Çezari, violinisti
nga Durrësi, që shumë e vlerësojnë si artist të jashtëzakonshëm. Megjithatë, dy-tri
penalata mbi mjeshtrin që erdhi në Itali në moshën 14 vjeçare, u diplomua me nota
të shkëlqyera në Akademinë prestigjoze të Shën Çeçiles, duke u bërë violinisti më
i ri i diplomuar, në historinë e konservatorit romak, na duken të arsyeshme. Një vit
pas Romës, e pret Mozarteum-i i Salisburgut, pas të cilit, çdo veprimtari kthehet
në sukses. Bashkëpunon me muzikantë të mëdhenj italianë e ndërkombëtarë, nga Bob Dylan
tek Michel Petrucciani, nga Leny Ravitz tek Maroon 5, e pastaj, Lucio Dalla, Claudio
Baglioni, Sergio Cammariere, Ana Oxa, Zucchero e të tjerë. I bie violinës kudo, edhe
para shën Gjon Palit II, duke merituar gjithnjë çmime të rëndësishme. Albumi i tij
i parë si autor muzike quhet “Unexpected” (I papritur) dhe të çon me anë të muzikës,
në anë të ndryshme të botës. Vetë Olen Çezari dhe orkestra e tij me emër domethënës
“International Clandestine Orchestra” (Orkestra Ndërkombëtare Klandestine) është nesër,
në orën 21, në Sallën Sinopoli të Auditoriumit “Parku i Muzikës” në Romë. Grupi shumëetnik
i përbërë nga gjashtë muzikantë, me gjashtë kombësi të ndryshme, - të gjithë të famshëm
në fushën e tyre - do të japë një koncert, me sfond pamje nga detet e oqeanet, ku
ndjehet prejardhja nga Durrësi e violinistit virtuoz, por edhe shija e hidhur, që
i ka mbetur nga mbytja e mijëra emigrantëve, të cilët e kanë varrin në fundin e detit.
“Shpirtit të tyre ia kushtojmë koncertin tonë”, thotë Olen Çezari, i cili erdhi të
na takojë në Radio Vatikan. Ja ç’na tha: