Papa Françesku shpalli sot, në festën e Krishtit Mbret, gjashtë shenjtorë të rinj
të Kishës Katolike. Mesha u kremtua në Sheshin e Shën Pjetrit, në orën 10.30. Pesë
burra e një grua, ndër të cilët dy indianë, Eufrasia Eluvathingal e Zemrës së Krishtit,
nga Kongregata e motrave të Nënës së Karmelit (gruaja e vetme ndër shenjtorët e rinj)
dhe meshtari Kuriakose Elias Chavara i Familjes Shenjte, themelues i Kongregatës së
Karmelitanëve të Zojës së Papërlyer. Të dy kanë jetuar në vitet ‘800. Katër të tjerët
janë të gjithë italianë. Tre, ndjekës të Shën Françeskut, apostuj të bamirësisë në
kohë të largëta e në rrethana të ndryshme. Amato Ronconi, terciar françeskan, lindur
rreth vitit 1226, themelues i spitalit të Shtegtarëve të Varfër në Saludeço të Emilia
Romanjës, që sot është kthyer në Shtëpinë e të moshuarve “Vepra e Mëshirshme” dhe
mban emrin e tij. Ludovico nga Casoria, lokalitet kampan, ku lindi në vitin 1814.
I pagëzuar me emrin Arcangelo Palmentieri, më vonë hyri në Urdhërin e Fretërve të
Vegjël e më pas, themeloi Motrat Françeskane Elizabetine, të ashtuquajturat Bigje.
I treti, Nicola Saggio nga Longobardi, ka jetuar në vitet ‘600. Është lindur në Kalabri
e ka qenë paolot i Urdhërit të të Vegjëlve, themeluar nga shën Françesku i Paolës.
Së fundi, Giovanni Antonio Farina, i njohur si ipeshkëv i të varfërve në Viçencë,
themelues i Motrave Mësuese të Shën Dorotesë Bija të Zemrave të Shuguruara.