Françesku: janë njerëzit, që e krijojnë zhvillimin, jo paratë, duhen nisma guximtare
Nuk duhet të shkurajohemi nga kriza, por të çlirojmë energji për ta rimenduar ekonominë
dhe botën e punës. Është sfida e Papës, në videomesazhin drejtuar pjesëmarrësve të
Festivalit për Doktrinën Shoqërore, hapur dje në Veronë, me temë: “Përtej vendeve,
brenda kohës”. Papa nënvizon se problemi i vërtetë nuk janë paratë, por njerëzit dhe
u drejton një përshëndetje të posaçme gjithë të rinjve, që jetojnë dramën e papunësisë.
T’u
jepet përgjigje nevojave të vërteta, duke fituar mbi tundimin e nënshtrimit para krizës,
me mendimin se nuk mund të bëhet asgjë për ta kapërcyer. Duke iu drejtuar pjesëmarrësve
të Festivalit të Doktrinës Shoqërore, Papa flet me fjalë inkurajuese për të gjithë
ata që ditë për ditë, në familje, në punë, në ndërmarrje, përpiqen ta përballojnë
një situatë, që mund të kallë frikë e të çorientojë. Tundimi i madh, shton Papa, është
ai, që të shtyn të ndalesh e të mjekosh plagët, duke gjetur në këtë ndalesë, përligjjen
se ishe i zënë e prandaj nuk munde t’i dëgjosh britmat e të varfërve e të shikosh
vuajtjen e njerëzve, që humbën dinjitetin, sepse humbën punën, humbën mundësinë për
ta çuar në shtëpi bukën e përditshme: “E këta, që mundohen të mjekojnë vetëm
plagët e veta, fshihen pas vetvetes. Ky është kurthi. Krijohet rreziku që indiferenca
të na bëjë të verbër, të shurdhër, mememcë, të pranishëm vetëm për vetveten, me pasqyrë
përpara, pa parë e pa ndjerë ç’ndodh jashtë nesh. Burra e gra, mbyllur brenda vetes.
Na ishte një herë dikush, që quhej Narciz… që ecte në këtë udhë”. Ne, shton
Papa, jemi të thirrur të ecim përtej e t’u përgjigjemi nevojave reale. Është urgjente
t’i braktisim vendet e zakonshme, që mbahen si të sigurta e të garantuara, për të
çliruar energji të reja: “Etika e krishterë nuk është doganë për pluralitetin
e fjalëve, me të cilat shprehet e mira e kujdesi për të afërmin. Të shkosh përtej,
do të thotë të zgjerosh e jo të ngushtosh, të krijosh hapësira e jo të kufizohesh
në kontrollin e tyre”. Të shkosh përtej, kujton Ati i Shenjtë, do të thotë
ta çlirosh të mirën e t’i gëzosh frytet e saj. Por, saktëson menjëherë pas, për të
shkuar përtej, është e nevojshme të marrësh nisma. Lidhur me këtë Françesku vëren
se Festivali i kushton hapësirë të gjerë ekonomisë dhe sipërmarrësve, sipërmarrjeve
dhe bashkëpunimit: “Sot edhe në fushën ekonomike është urgjente të merren nisiativa,
sepse sistemi ka prirjen të miratojë gjithçka, duke e bërë paranë padron. Sistemi
të çon drejt globalizimit jo të mirë, që pranon gjithçka. E padron i këtij miratimi
kush është? Është paraja. Të marrësh nisma në këto fusha, do të thotë të kesh guxim
e të mos burgosesh nga paraja e nga rezultatet afatshkurtëra, duke u bërë skllav”. Prej
këndej, ftesa e Papës për t’i parë gjërat në mënyrë të re. Sot, vëren me hidhërim,
thuhet se shumnë gjëra nuk mund të bëhen, sepse mungon paraja. E pra, për të bërë
ca gjëra nuk mungon kurrë paraja, ndërsa mungon, e tepër, kur është fjala për ca gjëra
të tjera. Për shembull, shton, para për të blerë armë gjinden, për të bërë luftëra
gjinden, për veprime financiare pa skrupull gjinden: “Për këto zakonisht heshtet:
nënvizohen shumë paratë që mungojnë për të krijuar punë, për të investuar në kulturë,
në zhvillimin e talenteve, për të projektuar një welfare të re, për të mbrojtur ambientin.
Problemi i vërtetë nuk janë paratë, por personat: nuk mund t’u kërkojmë parave të
bëjnë, atë që mund ta bëjnë e mund ta krijojnë vetëm njerëzit. Vetëm paratë nuk krijojnë
zhvillim, zhvillimin e krijojnë njerëzit, që kanë guxim të marrin nisma”. Të
marrësh nisma, nënvizoi, do të thotë të zhvillosh një sipërmarrje të aftë për novacione
jo vetëm teknologjike: “Duhen përtërirë edhe marrëdhëniet e punës, duke provuar
forma të reja të pjesëmarrjes dhe të përgjegjësisë së punëtorëve, duke shpikur formula
të reja të hyrjes në botën e punës, duke krijuar marrëdhënie solidare ndërmjet sipërmarrjes
e territorit. Të marrësh nisiativa, do të thotë ta kapërcesh asistencializmin”.Prej
këndej, edhe nevoja për t’i nxitur talentet, duke u krijuar hapësirën e duhur, sepse
çlirimi i talenteve është fillesa e mbarë për fillimin e ndryshimeve.