Imzot Auza: të ndalet genocidi i Shtetit Islamik kundër të krishterëve dhe pakicave
Genocidi i së kaluarës jo aq të largët duhet ta nxisë bashkësinë ndërkombëtare ta
ndalojë të ashtuquajturin “Shtet Islamik”. Kjo është thirrja e Vëzhguesit të përhershëm
të Selisë së Shenjtë në OKB, imzot Bernardito Auza, në Simpoziumin për mbrojtjen e
pakicave fetare, zhvilluar këto ditë në Pallatin e Qelqit, në Nju Jork. Është i nevojshëm
mobilizimi i ndërgjegjeve, nënvizoi imzot Auza, duke kërkuar, si përfaqësues i Vatikanit,
të konsiderohet “shumëpalëshe”, përgjegjësia për mbrojtjen e popujve nga genocidi,
spastrimi etnik, nga krimet kundër njerëzimit e nga çdo formë agresioni të padrejtë.
Prelati u ndal sidomos në gjendjen e të krishterëve në Irak e në Siri, ku persekutohen
nga xhihadistët: “Intoleranca
dhe aktet e tyre brutale në emër të fesë flasin qartë për dëmin e tmerrshëm, që mund
t’u shkaktojë njerëzve dhe vetë fesë, shtrembërimi i kësaj të fundit”. Imzot
Auza theksoi kërkesën e Selisë së Shenjtë që OKB-ja t’i konsiderojë krimet e xhihadistëve
si dhunim të hapur kundër të drejtave themelore të njeriut e t’i përballojë si të
tilla. Vëzhguesi i Vatikanit kujtoi se në të kaluarën, Kombet e Bashkuara nuk ditën
t’i ndalojnë si duhet genocidet, por duhet të nxjerrin mësim nga përvoja e hidhur
për të mos lejuar të përsëritet.