Jeruzalem: Hamasi dhe Xhihadi sulmojnë sinagogën. Vdesin katër besimtarë, vriten atentatorët
Tmerr e indinjatë në mbarë botën për sulmin e armatosur sot në një sinagogë të Jerusalemit
perëndimor, nga dy vetë të Hamasit. Rritet në kulm tensioni në Jerusalem pas atentatit
në sinagogën e Jerusalemit, në lagjen Har Nof, ku dy vetë hynë sot në mëngjes të armatosur
me sëpatë, thikë e pistoletë. Ata sulmuan besimtarët hebrenj të mbledhur në lutje,
duke shkaktuar së paku katër viktima e gjashtë të plagosur, disa, në gjendje të rëndë.
Më pas u vranë nga forcat izraelite të sigurisë. Dy nga policët u plagosën. Atentati
u mor përsipër nga organizata palestineze Hamas dhe nga Xhihadi islamik, të cilët
deklaruan se kjo ishte përgjigjja për varjen e një shoferi palestinez, që punonte
për një firmë izraelite. Menjëherë u prononcuan si lideri palestinez Abu Mazen,
ashtu edhe kancelaritë perëndimore, të cilat e dënuan ashpër sulmin. “Presidenca –
shkruhet në një komunikatë të zyrës së Abu Mazenit – i dënon sulmet kundër besimtarëve
hebrenj në vendin e tyre të lutjes dhe dënon vrasjen e civilëve, pavarësisht nga autori”.
Ndërkaq, kryeministri izraelit, Benxhamin Netanijahu, paralajmëroi se Tel Avivi do
të përgjigjet ashpër kundër kësaj vrasjeje brutale të hebrenjve.