Katolikët, në Perandorinë otomane në shekullin XVII: Kongresi i Berlinit
Në emisionin e sotëm të ciklit, mbështetur mbi studimin: “Katolikët në Perandorinë
otomane në shekullin XVII”, fryt i pendës së historianit jezuit atë Gjon (Giovanni)
Sale, botuar në revistën e mirënjohur të jezuitëve italianë “Civiltà Cattolica”, numri
3921, muaji nëntor 2013, arrijmë tek Kongresi i Berlinit (13 qershor-13 korrik
1878) dhe çështja shqiptare. Kongresi i Berlinit u hap më 13
qershor 1878, për të rishikuar Traktatin e Shën Stefanit. Merrnin pjesë 6 fuqitë e
mëdha të Evropës: Anglia, Gjermania, Franca, Rusia, Austro-Hungaria, Italia. Punimet
drejtoheshin nga kancelari gjerman Bismark. I pranishëm edhe një delegacion i
Perandorisë Osmane, kryesuar nga ministri i jashtëm, Kara Theodor Pasha, me ndihmës
të parë, Mehmet Ali Pashën, mareshall turk me origjinë gjermane. Ky delegacion nuk
kishte të drejtë t’i votonte vendimet e Kongresit. Të pranishëm, edhe delegacionet
e shteteve ballkanike. Ndërsa shqiptarët, posaçërisht përfaqësuesit e Lidhjes së Prizrenit
i paraqitën Kongresit kërkesat e tyre: mbrojtjen e tërësisë tokësore dhe të drejta
të tjera, që çonin drejt autonomisë. Kërkesat iu përcollën Kongresit prej një delegacioni,
kryesuar nga Abdyl Frashëri, me peticionin e miratuar në Lidhjen Prizrenit, më 15
qershor. Po fuqitë e mëdha nuk i përfillën fare kërkesat e përfaqësuesve të Shqipërisë.
Madje e injoruan fare ekzistencën e saj, me shprehjen e mirënjohur të Kancelarit gjerman:
“Shqipëria është një shprehje gjeografike”. Ndërsa Malit të Zi, si iu mohua zgjerimi
në veri, iu ‘dhuruan’ krahinat shqiptare të Tivarit, Podgoricës, Plavës, Gucisë, Rugovës
e Kolashimit. Nuk iu njoh aneksimi i Ulqinit, por anijeve tregtare malazeze iu dha
e drejta të lundronin lirisht në lumin Bunë dhe në Liqenin e Shkodrës. Greqisë ‘iu
dhurua’ Çamëria. Në protokollin n. 13 me kërkesën e Francës e të Austro-Hungarisë,
u njohën ‘venomet’ e Mirditës. Ky protokoll thellonte ndikimin austro-hungarez, që
gëzonte prej kohësh, bashkë me Francën, të drejtën e mbrojtjes së popullsive katolike
të Perandorisë osmane, por i mohonte Shqipërisë interesat e saj jetike. Prej këndej,
vendimet e Kongresit u pritën me rezistencë heroike nga ana e shqiptarëve, që kaluan
nga protokollet tek pallat, duke i mbrojtur me gjak ato toka shqiptare që, megjithatë,
kaluan në dorë të Malit të Zi, me ndërhyrjen e Fuqive të Mëdha. Ja si e përshkuan
Atë Fishta ‘Kongresin e Berlinit’ në Lahutë të Malcís: “… tue u rrasë kje Shkjau
Stambollit, Me zhbî mretin n’post të vet veç se u ranë krajlat ndërmjet.
Sot
t’ Shtatë krajlat e Sulltani, N’atë Berlin na janë bashkue, Na kanë nisë me
bisedue, Për me vu paqë edhe besë, Për me shue luftë e ngatrresë, Zemër të
keqe, mëní e resë, Tue ngulë gurë, tue ngulë kufi, Përgjithë vend, për gjith
mbretní”.
I shuan, apo i ndezën më keq ngatërresat, të shtatë krajlat? Poeti
Kombëtar i jep përgjigje ndërhyrjes së tyre grabitqare në fatet e Shqiptarëve, me
vargjet: “S’ka shka bân ndër ta i huej Se ata gjallë s’i shtrohen kujë n’dashtë
t’jetë Knjaz e n’dashtë t’jetë Mbret Se ata Mbret ishin n’dhe të vet: Fort gabon,
kush i gerget!”