Fitore e republikanëve në SHBA në zgjedhjet e gjysëm-mandatit
Republikanët amerikanë marrin në dorë të dyja Dhomat e Kongresit. Kishte ditë, që
vihej në dukje rreziku i zgjedhjeve të gjysmës së mandatit për presidentin e majtë
Barak Obama. Frika më e madhe e demokratëve ishte pikërisht kalimi i Senatit në duart
e republikanëve, gjë që jo vetëm ndodhi, por u shoqërua edhe me shtimin e deputetëve
republikanë në Dhomën e Ulët të Kongresit, ku edhe më parë ata ishin shumica. Që prej
tetë vjetësh, republikanët nuk i kontrollonin më të dyja dhomat së bashku, ndërsa
një shumicë të tillë (242 vende) në Dhomën e Ulët si kësaj here, nuk e zotëronin që
nga fundi i Luftës II Botërore. Shenjë e qartë se politika e Obamës nuk funksionon
më për një popull, që është mësuar të gjykojë rezultatet. Të dëgjojmë komentin e pedagogut
të studimeve strategjike në Universitetin italian “Luiss”, Germano Dottori: “Sipas meje,
është një fazë politike shumë delikate, edhe sepse do të përkojë faktikisht me fillimin
e fushatës për zgjedhjen e presidentit në vitin 2016. Obama do të ketë vështirësi
si në vazhdimin e politikës së tij të jashtme – për të cilën, ndër të tjera, kundërshtohet
edhe nga sektorë mjaft të mëdhenj të partisë së vet – ashtu edhe në realizimin e mbrojtjen
e disa reformave të brendshme më të rëndësishme, të cilat ai ka ndërmend t’i lerë
si trashëgimi politike të vetën”. Fitorja e së djathtës parashikohej gjerësisht
nga sondazhet, por qe edhe më e madhe se parashikimet. Së paku shtatë, shtetet që
kaluan nga demokratët në dorën e republikanëve: North Carolina, Arkansas, Colorado,
Iowa, West Virginia, Montana, South Dakota. E këto dy të fundit konsideroheshin pa
diskutim “pronë” e demokratëve. Sërish, prof. Dottori: “Është e qartë se kemi
të bëjmë me një efekt zinxhir, nga i cili përfituan shumë kandidatë, që nuk ishin
të favorizuar në prag të zgjedhjeve. Më duket se Partia Republikane kontrollon tashmë
Mead West-in – që historikisht ka qenë një nga kështjellat e saj më të rëndësishme
– dhe ruan pozicione me vlerë strategjike në Jug, si Florida. Megjithatë, unë mendoj
se është e parakoshme të përcaktojmë se si do të shkojnë zgjedhjet e ardhshme presidenciale,
pas dy vjetësh. Kjo, sidomos për këtë arsye: Partia Demokratike, në këtë çast, zotëron
një numër më të madh personalitetesh, që mund të kandidojnë për president, ndërsa
republikanët kanë problemin e zgjedhjes së një individi, në të njëjtin nivel me kundërshtarin.
Ata janë tepër të përçarë brenda partisë. Pastaj, duhet kujtuar se kur amerikanët
votojnë për presidentin zgjedhin personin e jo partinë, prandaj dinamika mund të jetë
shumë e ndryshme nga ç’pamë gjatë kësaj fushate për zgjedhjet e gjysëm-mandatit”. Sipas
shtypit, Obama është dënuar nga votuesit për premtimet e shumta të parealizuara e
për mungesën e dorës së fortë në sektorin e ekonomisë e të politikës së jashtme.