Të krishterë që janë aq fort të lidhur me ligj, sa anashkalojnë drejtësinë dhe të
krishterë të lidhur me dashuri që e zbatojnë deri në fund ligjin: mbi këtë foli Papa
Françesku në homelinë e Meshës kremtuar në mëngjes në shtëpinë e Shën Martës, në Vatikan. Në
Ungjillin e sotëm, Jezusi u kërkon farisenjve nëse është e ligjshme apo jo të shërosh
të shtunën, por ata nuk përgjigjen. Ai, merr për dore një të sëmurë dhe e shëron.
Farisenjtë – vëren Papa – që gjendeshin para së vërtetës, heshtnin “por pastaj përgojonin,
ankoheshin prapa shpine.. bënin përpjekje se si ta rrëzonin atë”. Jezusi i qortoi
këta njerëz që “aq shumë ishin të lidhur me ligj, por e kishin harruar drejtësinë”
e mohonin deri edhe ndihmën e prindërve të moshuar, duke u arsyetuar se kishin dhënë
gjithçka dhuratë në Tempull. Po “kush është më i rëndësishëm? – pyet Papa – Urdhri
i katër i Tënzot apo Tempulli?”: “Kjo udhë dhe mënyrë e të jetuarit të ligjit,
i largonte ata nga dashuria e nga drejtësia. Kultivonin ligjin, anashkalonin drejtësinë.
Kultivonin ligjin, anashkalonin dashurinë. E këta njerëz ishin shembull. Por për këta
njerëz Jezusi ka vetëm një fjalë: hipokritë. Nga njëra ishin të lidhur e të kapur
për ligj, nga ana tjetër të mbyllur para nevojave të njerëzve, të mbyllur në egoizmin
e tyre, duke harruar se ligji i vërtetë është dashuria”. “Krishti - tha Papa – na
mëson udhën e dashurisë e të drejtësisë, që çon te Hyji”, e në anën tjetër na fton
t’i heqim dorë nga egoizmi e mbyllja në vetvete.