Papa Françesku: Të qëndrosh krah të varfërve është Ungjill, jo komunizëm
Toka, shtëpia, puna. Këto ishin tri pikat themelore, rreth të cilave reflektoi Papa
Françesku të martën e kaluar, në takimin me pjesëmarrësit e Lëvizjeve Popullore, mbledhur
në Romë nga e gjithë bota. Ati i Shenjtë nënvizoi se duhen rigjallëruar demokracitë,
duhet zhdukur uria dhe luftrat, u duhet garantuar të gjithëve dinjiteti, sidomos më
të varfërve e më të mënjanuarve. Papa Françesku foli plot pasion, dha shpresë,
por edhe denoncoi njëkohësisht, e fjalët e tij bënë xhiron e botës, duke marrë vlerën
e një enciklike të vogël të Doktrinës Shoqërore të Kishës. Që në Argjentinë, Horhe
Mario Bergolio njihej si person, që u qëndronte gjithnjë afër bashkësive popullore
si “cartoneros” dhe “campesinos”. Lëvizjet Popullore janë mishërimi i solidaritetit,
por u duhet të përballojnë pasojat shkatërruese të perandorisë së parasë. Papa vuri
në dukje se nuk mund të fitohet mbi varfërinë vetëm duke e kufizuar atë, sepse kjo
i kthen të varfërit në njerëz pasivë. Ati i Shenjtë u ndal në tri pika kryesore: “Toka,
çatia mbi krye dhe puna. Është e çuditshme, por kur flas për këto gjëra, dikujt i
duket sikur Papa është komunist. Nuk kuptohet se dashuria për të varfërit është në
qendër të Ungjillit”. Toka, shtëpia e puna, vazhdoi Françesku, janë të drejta
të shenjta, bëjnë pjesë në Doktrinën Shoqërore të Kishës. Papa përshkroi një situatë
aspak të lehtë. Fshatarët çrrënjosen nga toka e tyre për shkak të luftrave dhe të
fatkeqësive natyrore; miliona njerëz vuajnë nga uria, ndërsa spekullimi financiar
kushtëzon çmimet e ushqimeve; në qytetet e mëdha, që mburren se u japin të drejtat
pakicave, mijëra të tjerë, përfshirë fëmijët, nuk kanë shtëpi; jetojmë në vende plot
me qendra tregtare të stërmëdha, por me miliona njerëz të mënjanuar në periferi...
E si për të fshehur këto shkelje të dinjitetit njerëzor, gjejmë eufemizma, denoncoi
Ati i Shenjtë. Për njeriun e mjerë pa shtëpi, themi “pa strehë të përhershme”. Papa
lavdëroi ato qytete, që ndjekin linjën e integrimit urban, ku favorizohet njohja me
tjetrin. Pastaj, foli për punën: “Nuk ekziston varfëri materiale më e keqe se
ajo, që nuk të lejon të fitosh bukën e gojës e të privon nga dinjiteti i punës”. Papa
Françesku përmendi papunësinë e të rinjve,e cila në disa vende kapërcen 50% të forcës
së punës. Të gjithë, theksoi, kanë të drejtë për një pagesë të denjë e për siguri
shoqërore. Në shumë vende të botës, ngriti zërin Ati i Shenjtë, punëtorëve nuk u lejohet
as të formojnë sindikata. Pastaj, denoncoi sërish mënjanimin e fëmijëve dhe të të
moshuarve nga shoqëria, si edhe ato sisteme ekonomike të sëmura, që për të mbijetuar,
kanë nevojë të nxisin luftra. Papa ripropozoi konceptin e Luftës III Botërore, që
sipas tij po zhvillohet pjesë-pjesë, në anë të ndryshme të botës: “Sa vuajtje,
sa shkatërrim, sa dhimbje. Sot, lartohet nga të gjitha anët e tokës, nga të gjithë
popujt, nga çdo zemër e çdo lëvizje popullore, thirrja për paqen: Kurrë më luftë!” Një
sistem ekonomik, që bazohet mbi paranë, vazhdoi Papa Françesku, shfrytëzon natyrën
për të mos e ulur ritmin frenetik të konsumit, nga i cili rrjedhin efekte shkatërruese
si ndryshimi i klimës dhe shpyllëzimi. Ati i Shenjtë kujtoi se po përgatit një Enciklikë
për ekologjinë, ku ngre pyetjen pse po përjetojmë këto situata: “Sepse, në këtë
sistem, njeriun e kanë përzënë nga qendra dhe e kanë zëvendësuar me diçka tjetër.
Sepse ngrihet paraja në një kult idhulltar, sepse është globalizuar indiferenca...
Sepse bota ka harruar se e ka Zotin për Atë, duke u bërë kështu jetime, pasi e ka
lënë Hyjin mënjanë”. Papa u bëri thirrje Lëvizjeve Popullore ta ndryshojnë
këtë sistem, duke ndërtuar struktura të tjera shoqërore. Në të krishterët, vuri në
duke Ati i Shenjtë, kemi një program të bukur: lumnitë dhe kapitullin e 25-të të Ungjillit
sipas Mateut. Papa ritheksoi rëndësinë e kulturës së takimit kundër çdo diskriminimi
dhe nënvizoi se është e nevojshme që lëvizjet të koordinohen më mirë, pa ngritu struktura
të ngurta: “Lëvizjet Popullore shprehin nevojën urgjente për rigjallërimin e
demokracive tona, shpesh, të kapura në kurth nga faktorë të panumërt. Është e pamundur
të imagjinohet e ardhmja e një shoqërie, pa pjesëmarrjen si protagonistë të shumicës”. Duhet
të kapërcejmë, tha Papa, asistencializmin e të nxisim forma të reja pjesëmarrjeje
në pushtet, që përfshijnë edhe lëvizjet popullore. Së fundi, thirrja: “Asnjë
familje pa shtëpi. Asnjë fshatar pa tokë! Asnjë punëtor pa të drejta! Askush pa dinjitetin,
që i jep puna”.