Papa: të krishterët e Lindjes së Mesme, të persekutuar nga indiferenca
U hap sot paradite në Sallën e Sinodit, Koncistori i Zakonshëm Publik, i kryesuar
nga Papa Françesku. Qëllimi i tij fillestar ishte kanonizimi i të Lumëve Giuseppe
Vaz, meshtar i Oratoriumit të Shën Filip Nerit, themelues i Oratoriumit të Shenjtes
Krygjë të Mrekullueshme në Goa dhe apostull në Sri Lanka e në Indi; si edhe kanonizimi
i Maria Cristina e Zojës së Papërlyer, themeluese e Kongregatës së Motrave Viktima
Shpërblyese të Jezusit kthyer në Sakrament. Por, me vendim të Atit të Shenjtë, siç
u lajmërua gjatë Sinodit për Familjen, ky Koncistor i kushtohet edhe gjendjes së të
krishterëve në Lindjen e Mesme. “Të nesërmen e
mbylljes së Asamblesë së tretë të përgjithshme të jashtëzakonshme të Sinodit të Ipeshkvijve
për Familjen – tha Papa Françesku, duke përshëndetur të pranishmit, ndër të cilët,
edhe Patriarkët e Lindjes së Mesme – desha t’ia kushtoj këtë Koncistor, përveçse disa
çështjeve kanonizmi, edhe një problemi tjetër që e kam shumë për zemër, Lindjes së
Mesme e, në veçanti, situatës së të krishterëve në rajon. Ju jam mirënjohës për praninë
tuaj”. Rruga që kërkon Papa është zgjidhja e konflikteve përmes dialogut, pajtimit
dhe impenjimit politik. Gjithashtu, Ati i Shenjtë bën thirrje t’u jepet më tepër ndihmë
bashkësive të krishtera, në mënyrë që të mos largohen nga rajoni: “Siç kam
pasur rast të theksoj disa herë, nuk mund të ngremë duart e ta mendojmë Lindjen e
Mesme pa të krishterë, të cilët, që prej 2 mijë vjetësh, dëshmojnë emrin e Jezusit.
Ngjarjet e fundit, sidomos në Irak e në Siri, janë shumë shqetësuese. Vërejmë një
fenomen terrorizmi me përmasa të paimagjinueshme më parë”. Tashmë, vëllezërit
tanë persekutohen e detyrohen me brutalitet t’i lënë shtëpitë e tyre, ngriti zërin
Ati i Shenjtë: “Duket sikur ka humbur vetëdija për vlerën e jetës njerëzore,
duket sikur njeriu nuk vlen më e mund të sakrifikohet për interesa të tjera. E fatkeqësisht,
e gjithë kjo, në indiferencën e shumë vetëve”. Kjo gjendje, kërkoi Papa, përveç
lutjes së vazhdueshme, ka nevojë edhe për angazhimin e bashkësisë ndërkombëtare. Ati
i Shenjtë shprehu sigurinë se nga Koncistori do të dalin reflektime e sugjerime për
të ndihmuar praninë e të krishterëve në zonën ku lindi dhe u përhap krishterimi vetë.