Në Kosovë kremtohet Dita Ndërkombëtare për Zhdukjen e Varfërisë
Shoqata ‘Nëna Terezë’ e Kosovës dhe karvani ‘Hope and Aid Direct’ nga Anglia, kanë
filluar misionin e tyre humanitar për të kremtuar në terren Ditën Ndërkombëtare për
Zhdukjen e Varfërisë duke nxitur ndërgjegjësimin e institucioneve dhe njerëzve vullnetmirë
për të bërë më shumë në ç’rrënjosjen e varfërisë. Na informon Mrikë Ibraj nga Prishtina...
Drejtori i Shoqatës
‘Nëna Terezë’, Zef Shala, ka shpjeguar permes një komunikate për shtyp se mbështetja
e familjeve nevojtare është misioni kyç i Shoqatës dhe qe 10 vjet lehtëson rrugëtimin
e Karvanit Humanitar të vullnetarëve nga Anglia. ‘Dy herë në vit mbledhin të mira
humanitare, si ushqime, veshëmbathje, mjete shkollore dhe higjienike dedikuar familjeve,
individëve dhe institucioneve në nevojë të Kosovës. Të gjithë ne duhet të tregojmë
përgjegjësi për të mbrojtur njerëzit e varfër’, ka thënë Shala. Ai ka potencuar se
17 Tetori paraqet një mundësi për të njohur përpjekjet e atyre që jetojnë në varfëri,
dhe një ditë për të ri-theksuar atë që duhet pasur parasysh çdo ditë, se të varfërit
janë të parët që luftojnë kundër varfërisë. Shala, ka përcjell porosinë që të ndihmohen
të varferit dhe të veprohet me mirësi ndaj tyre. Përfaqësusesi nga Karvani Anglez,
Charles Storer, është shprehur se vizitojnë Kosovën për të ndihmuar familjet që jetojë
në kushte të rënda sociale dhe ekonomike. “Në shpalosjen e vlerave të rëndësishme
të bamirësisë dhe kontributit në komunitet, Karvani Anglez i bashkohet Shoqatës ‘Nëna
Terezë’ në misionin drejtë zhdukjes së varfësirë në Kosovë. Kësaj radhe, përmes ndihmave
të mbledhura në Angli, ne po përkrahim mbi 450 familje me 2250 anëtarë, dhe 10 shkolla
të mesme e të ulëta në rajonin e Mitrovicës. Përmes vizitave tona në Kosovë, ne synojmë
t’u japim zë familjeve, individëve dhe institucioneve të cilët kanë nevojë për ndihmën
tonë përmes lobimit e ngritjes së vetëdijës së qytetarëve për të ditur se në çfarë
gjendje janë nevojtarët,” ka thënë Storer. Shoqata ‘Nëna Terezë’ synon që përmes
programeve të veta të ndihmojë në zvoglimin e varfërisë në Kosovë përmes projekteve
humanitare me donatorë të jashtëm e të brendshëm. Në data bazën e kësaj shoqate çdo
ditë shtohen familje që kanë nevojë për përkrahje në strehim e ndihma elementare për
mbijetesë. Për çdo vit, ndihmohen mbi 6000 familje në tërë Kosovën, por në krahasim
me nevojat në terren, këto arritje mbeten rezultate simbolike për ShBH ’Nëna Terezë’
në Kosovë.