Papa në audiencën e përgjithshme: shpresa e krishterë nuk është optimizëm. Kisha duhet
ta mbajë atë të ndezur
Shpresa e krishterë nuk është optimizëm i thjeshtë, por pritje e apasionuar e Jezusit,
i cili do të kthehet për të nisur një epokë pa sundim të njeriut mbi njeriun e pa
dallime. Papa Françesku ia kushtoi katekizmin e audiencës së përgjithshme në sheshin
e Shën Pjetrit, destinacionit të fundmë të njerëzimit e të Kishës, sipas këndvështrimit
të fesë. Fjalët më të bukura për shpresën e krishterë i pati thënë para dymijë
vjetësh Shën Pali Apostull, kur iu përgjigj selanikasve, që e pyesnin për jetën pas
vdekjes: “E kështu, do të jemi gjithmonë me Zotin”. Papa Françesku e përsëriti disa
herë këtë frazë dhe u tha ta përsërisnin në kor edhe mëse 50 mijë besimtarëve të mbledhur
në Sheshin e Shën Pjetrit, si për t’u ngulitur mirë në kokë njerëzve të bombarduar
çdo ditë nga dyshime që paraqiten si maja më e lartë e mendimit, se siguria e fundme
për të cilën na flet feja nuk është punë çiliminjsh: “Janë fjalë të thjeshta,
por me një dendësi shprese të jashtëzakonshme! ‘E kështu, do të jemi gjithmonë me
Zotin!’. A besoni ju në këtë? Më duket se jo… Besoni? A e përsërisim tri herë së bashku?
‘E kështu, do të jemi gjithmonë me Zotin! E kështu, do të jemi gjithmonë me Zotin!
E kështu, do të jemi gjithmonë me Zotin!’”. Reflektimi i Papës Françesku hyri
në misterin e përshkruar në Librin e Zbulesës, ku Populli i Zotit merr formën e “Jeruzalemit
të ri”, që shkon drejt të dashurit të tij, si të ishte nuse: “E nuk është vetëm
sa për të thënë: do të jetë dasmë e vërtetë! Po, sepse Krishti, duke u bërë njeri
si ne e duke na bërë edhe ne një gjë të vetme me Të, me anë të vdekjes e ringjalljes,
vërtet u martua me ne…e kjo s’është tjetër veçse plotësimi i planit të bashkimit e
të dashurisë, endur nga Zoti gjatë historisë: historia e Popullit të Hyjit dhe historia
e secilit prej nesh. Është Zoti ai, që e çon përpara gjithë këtë”. Imazhi
i “Jeruzalemit të ri”, shpjegoi më tej Ati i Shenjtë, thotë edhe një gjë tjetër për
Kishën. Ajo është e thirrur të bëhet qytet, simbol i bashkëjetesës dhe i marrëdhënieve
njerëzore: “Do të jetë ‘tenda e Zotit’! E në këtë kornizë të lavdishme nuk
do të ketë më izolime, mbizotërime e dallime të asnjë lloji – as të natyrës shoqërore,
as etnike apo fetare – por do të jemi të gjithnjë një gjë e vetme në Krishtin”. Shpresa
e krishterë për fundin e kohrave është një skenar i paparë e i mrekullueshëm, tha
Papa Françesku. A jemi dëshmitarë të kësaj shprese, pyeti Ati i Shenjtë besimtarët.
Apo jemi të lodhur e s’presim asgjë: “Shpresa e krishterë nuk është thjesht
një dëshirë, një urim, nuk është optimizëm: për të krishterin shpresa është pritja
e dikujt që po vjen, është Krishti Zot… Atëherë, Kisha e ka për detyrë ta mbajë ndezur
në mënyrë të dukshme llambën e shpresës, që të vazhdojë të shndrisë si shenjë e sigurtë
shëlbimi e të mund të ndriçojë për gjithë njerëzimin shtegun, që çon në takimin me
fytyrën e mëshirshme të Hyjit”.