Kosovë: Shkrime në favor të ISIS në mure të manastirit të Deçanit
Shkrime lavdi për islamikët e ISIS dhe luftëtarët shqiptarë të UCK-së, me mesazhin
alarmues ‘Kalifati po vjen’, janë dukur në muret që rrethojnë manastirin ortodoks
të Deçanit, që është nën mbrojtje të UNESCO-s. Forcat e Nato-s në Kosovë kanë nisur
hetimet për gjetjen e përgjegjësve të provokimeve, ndërsa mbikëqyrja e kontrolli i
manastirit të murgjve ortodoksë serbë është përforcuar nga kontingjenti italian i
Kforit, që ka si detyrë pikërisht ruajtjen e këtij vendi kulti e të kësaj zone. Ngjarja
është dënuar nga autoritetet serbe e po kështu edhe nga ato kosovare.“Vandalizimi
i një monumenti të trashëgimisë kulturore dhe të karakterit fetar nuk i kontribuon
ndërtimit të mirëbesimit mes komuniteteve dhe bie ndesh me vlerat e tolerancës ndërfetare
dhe etnike që janë vënë në gurthemelin e shtetit të Kosovës”, thuhet në një komunikatë
për medie nga Zyra e Presidentes së Kosovës. Përgjegjësi i manastirit të Deçanit,
murgu Atë Sava Janjic ka kërkuar nga forcat e Kforit siguri më të madh të vendit e
të murgjve.