Papa: puna është e drejtë për të gjithë e jo një “variabël” i tregut
Shteti i së drejtës shoqërore nuk duhet shkatërruar, sidomos e drejta themelore për
punë: kjo qe tema e bisedës së Papës Françesku në takimin me pjesëmarrësit e asamblesë
së përgjithshme të Këshillit Papnor për Drejtësinë e Paqen, që vijon në Vatikan. Janë
urgjente reformat për rishpërndarjen e pasurisë dhe për sigurimin e arsimimit e të
mjekimit për gjithë të varfërit. Nuk mund të varet nga humori i bursave ajo, që
është thelbësore për dinjitetin e çdo njeriu, sidomos kur për miliarda vetë, ky dinjitet
vlerësohet me “më pak se dy dollarë në ditë”. Puna, sipas Atit të Shenjtë, nuk është
e drejtë e tjetërsueshme e s’mund të varet nga kriza e globalizimit pa kontroll, e
cila ka krijuar pabarazi të reja dhe e ka keqësuar më tej ekuilibrin ndërmjet të varfërve
e të pasurve: “Një mungesë e tillë e ekuilibrit, jo vetëm nuk e respekton dinjitetin
e atyre, që mbushin radhët e krahëve të punës me çmim të lirë, por i shkatërron burimet
e punës edhe në ato rajone ku ruhet më mirë ky ekulibër. Problemi është krijimi i
mjeteve për mbrojtjen e së drejtës për punë, si edhe për mbrojtjen e ambientit, në
praninë e një ideologjie konsumiste në rritje, që nuk tregon përgjegjësi për qytetet
e gjithësinë”. Në Thirrjen Apostolike “Evangelii gaudium”, kujtoi Françesku,
arsimi, asistenca shëndetësore dhe puna janë tri mjete themelore për përfshirjen e
nevojtarëve në shoqëri: “Me fjalë të tjera, Shteti i së drejtës shoqërore nuk
duhet shkatërruar e në veçanti, e drejta themelore për punë. Kjo nuk mund të konsiderohet
ndryshore, që varet nga tregjet financiare e monetare… Botëkuptimet, që pretendojnë
ta rrisin prodhueshmërinë duke zvogëluar numrin e vendeve të punës – gjë që krijon
të mënjanuar të rinj – nuk përkojnë me një ekonomi në shërbim të njeriut e të së mirës
së përbashkët, me një demokraci gjithëpërfshirëse”. Papa kërkon reforma që
ndihmojnë familjet, që synojnë rishpërndarjen e pasurive si në planin kombëtar, ashtu
edhe në atë ndërkombëtar. Zgjidhja nuk është e lehtë, pranon Ati i Shenjtë, i cili
këshillon të rilexohet “Caritas in veritate”, shkruar nga Benedikti XVI, ku shpjegohet
se dashuria ndërmjet njerëzve, e bazuar mbi të vërtetën, është baza për arritjen e
paqes shoqërore.