Të komunikojmë familjen: tema e Ditës Botërore të Komunikimeve Shoqërore 2015
“Të komunikojmë familjen: ambient i privilegjuar takimi, me dashuri pa interes”: kjo
është tema, që Papa Françesku ka zgjedhur për Ditën e 49-të të Komunikimeve Shoqërore,
e cila do të kremtohet më 17 maj 2015. Është e qartë se tema ndjek atë të dy Sinodeve
për familjen. Komunikata e dikasterit përkatës vatikanas vë në dukje problemet e përditshme
të familjes së sotme, duke nënvizuar se marrëdhëniet ndërmjet anëtarëve të saj, dashuria
pa interes që shkëmbejnë ndërmjet tyre, respekti i ndërsjellë e mbrojtja e dinjitetit
të secilit, janë vlerë e rëndësishme për shoqërinë, sepse janë baza e dialogut, mikpritjes,
solidaritetit, gatishmërisë e shërbimit. Por si t’ua thuash këtë njerëzve të sotëm?
Si t’u shpjegosh se dashuria ndërmjet një burri e një gruaje është diçka shumë e çmuar,
se fëmijët janë dhuratë, se familja është forca për të rinisur gjithçka nga fillimi,
se është bukuria e jetës, gëzimi i dashurisë, ngushëllim për këdo, takimi i parë me
tjetrin. Kisha sot, duhet të mësojë si t’i tregojë botës së familja është dhuratë
e madhe e Zotit, se është diçka e mirë dhe e bukur. Tema e Ditës Botërore të Komunikimit
duhet të shërbejë pikërisht për të reflektuar mbi mënyrën e transmetimit të vlerave
të familjes në shoqërinë e ditëve tona. Për këtë do të ndihmojë edhe mesazhi i Atit
të Shenjtë për këtë Ditë, që tradicionalisht publikohet më 24 janar, me rastin e festës
liturgjike të Shën Françeskut të Sales, pajtor i gazetarëve.