Letër falenderimi Atit të Shenjtë, një ditë pas shtegtimit apostolik në atdheun e
shqipeve
Kisha Katolike në Shqipëri i ka dërguar një letër falenderimi Atit të Shenjtë, një
ditë pas shtegtimit të tij të paharruar apostolik në atdheun e shqipeve. Ipeshkvijtë
vënë në dukje sidomos fjalën pa letër të Papës Françesku në katedralen e Shën Palit
në Tiranë, ku Ati i Shenjtë i këshillon të gjejnë gjithnjë ngushëllim në krahët e
Hyjit të Gjithpushtetshëm. Ata i kujtojnë përmallimin për vuajtjen e të mbijetuarve
dhe mënyrën si i shprehu ndjenjat e tij të sinqerta për klerin, besimtarët katolikë
dhe popullin shqiptar. E pastaj premtimi: “Impenjohemi të fluturojmë lart, Shenjtëri;
impenjohemi të kemi si pikë të vetme referimi Krishtin, Zotin e vetëm të jetës sonë
e të “ngushëllohemi” vetëm prej Tij; impenjohemi t’i bëjmë bashkësitë tona kishtare
hapësira mikpritjeje e dialogu, që Dashuria e Krishtit të mbrujë gjithnjë e më shumë
jetën e këtij populli e t’i japë ngjyrë e shije aftësitë ekzistuese për bashkëjetesë
paqësorë ndërmjet kulturave dhe feve të ndryshme”. E më pas, pasi nënvizojnë
se vazhdojnë të luten për të, falenderimi për Papën Françesku: “Ju themi ‘Faleminderit’,
Shenjtëri, në emër të gjithë popullit shqiptar, por sidomos, në emër të gjithë Popullit
të Zotit – meshtarë, rregulltarë, rregulltare e besimtarë laikë – që ecën në këtë
Tokë të Shqipeve, [popull] të cilit i dhatë mundësinë të provojë ‘gëzimin e Ungjillit’
dhe e përforcuat në fenë e në shpresën, që nuk zhgënjen kurrë”. Letra përfundon
me urimin e Ungjillit: “Bekuar qoftë ai, që vjen në emër të Zotit”.