Françesku për Papën, Kishën e Botën: intervista. Dekalogu i Françeskut
Në prag të vizitës së Papës në Shqipëri, Dekalogu i Françeskut, 10 këshilla, për të
qenë i lumtur. Të diel, më 27
korrik, “Viva” (shtojcë e përjavshme e gazetës argjentinase “Clarin”) botoi një
intervistë me Papën Françesku. Ishte intervista e parë e Jorge Mario Bergoglios, argjentinas,
dhënë një gazetë të vendit të vet. E duhet kujtuar se dilte në një numër të posaçëm,
kushtuar 500 ditëve të papnisë së tij. Artikulli, nënshkruar nga gazetari Pablo Calvo,
lindi nga takimi i 7 korrikut në Shtëpinë e Shën Martës, që zgjati 77 minuta. U ribotua
e u citua nga shumë faqe të internetit e gazeta ndërkombëtare, për përmbajtjen tejet
personale të pyetjeve e po aq edhe të përgjigjeve, që dha Ati i Shenjtë. E, sidomos,
për formën e tij. Ndërmjet tjerash, e kjo ishte pjesa më e cituar e më e përsëritur
e gjithë intervistës, Papa dha dhjetë këshilla, që të ndihmojnë për të qenë i lumtur.
U paraqitën nga revista ‘Viva’ në një video të shkurtër, botuar online, si dekalog: 1.
Jeto e lërë të jetojnë Papa i këshillon të gjithë të udhëhiqen nga ky parim,
që Roma e përmbledh në shprehjen “Campa e lascia campare”: “Ec përpara e lëri edhe
të tjerët të bëjnë të njëjtën gjë”. 2. Dhuroja veten të tjerëve Njerëzit
kanë nevojë të jenë zemërhapur e bujarë me të tjerët, sepse po ta mbyllin zemrën,
rrezikojnë të bëhen egoistë. E uji i ndenjur qelbet shpejt. 3. Ec ngadalë Për
ta shpjeguar këtë pikë, Françesku përdori personazhin e një romani të Rikardo Güiraldes,
në të cilin protagonisti, don Segundo Sombra, kthehet mbrapa e lexon jetën e vet.
Kujton, kështu, se në rini ishte përrua plot gurë, që merrte me vete ç’të gjente;
në pjekuri, lumë i rrëmbyer; në moshë të shtyrë, rridhte akoma, po me rrjedhë të shtruar”.
Tha se i pëlqen shumë kjo figurë, ky simbol i lumit me rrjedhë të qetë, sepse i kujton
aftësinë për të lëvizur njerëzishëm e përvujtërisht, simbol i “kohës së qetësisë në
jetë”. Të moshuarit e kanë këtë urti, janë kujtesa e popullit. 4. Ruaje kohën
e lirë Papa citoi artet, letërsinë e edhe kohën për të luajtur me fëmijët.
Konsumizmi na mbush me ankth, shtoi, kur mendojmë se mund ta humbasim kulturën e shëndetshme
të kohës së lirë. Kam thënë se duhet shuar televizori, kur ulemi në sofër: është i
nevojshëm për ecur me kohën, por në sofër të pengon të komunikosh me të tjerët. 5.
Kaloje të dielën në familje E diela është ditë feste. Dje, në Campobasso, mora
pjesë në një takim të botës universitare e asaj të punës; të gjithë kërkonin që e
diela të jetë ditë pushimi. E diela është për familjen”. 6. Të punojmë me frymë
krijuese, për t’u siguruar punë të rinjve Duhet të jemi krijues me të rinjtë.
Nëse u mungojnë mundësitë, bëhen lehtë viktima të drogës. E ndërmjet të rinjve pa
punë, përqindja e vetvrasjeve është shumë e lartë. Nuk mjafton t’u japësh për të ngrënë:
duhen shpikur kurse për hidraulikë, elektricistë, rrobaqepës. Dinjiteti fitohet, kur
çon bukën e përditshtme në shtëpi. 7. Të kujdesemi për natyrën Degradimi
ambiental është një nga sfidat më të mëdha, për të cilën jemi të thirrur. 8. Harroji
shpejt e shpejt punët e këqija Nevoja për të folur keq për të tjerët, tregon
se e nderon tepër pak vetveten. Është njëlloj si të thuash: “Ndjehem aq i vogël sa,
në vend që të përmirësoj vetveten, përpiqem ta keqësoj të afërmin”. Gjë shumë e mirë,
t’i harrosh sa më shpejt punët e liga! 9. Respektoje mendimin e tjetrit, pa
prozelitizëm Besimi i tjetrit duhet respektuar. Mund ta frymëzojmë tjetrin
me dëshminë tonë, që të rritemi së bashku, por jo me prozelitizëm fetar, gjëja më
e keqe. Paralizon! Flas me ty, për të të bindur. Jo, çdo njeri duhet të dialogojë,
duke u nisur nga identiteti i vet. Kisha zhvillohet për forcën tërheqëse, jo për prozelitizëm. 10.
Puno për paqen Jetojmë në një kohë luftërash e duhet ta ngrejmë zërin në kupë
të qiellit, për të kërkuar paqen. Paqja nganjëherë të krijon përshtypjen e një gjëje
të qetë, por nuk është kurrë ashtu: është gjithnjë paqe aktive.