Gjon Pali II vizitoi Mauzoleun e Redipuglia-s më 3 maj 1992
Të dashur vëllezër e motra, Përballë këtij mauzoleu madhështor, më i madhi në Itali,
ndjehem thellësisht i prekur, duke kujtuar flijimin e mijëra djelmoshave e vuajtjet
e shkaktuara nga lufta. Nga ky vend, i pasur me kujtime e ndjesi fetare, i drejtoj
secilit nga ju përshëndetjen time të përzemërt. Ju përsëris sot ju, atë që pata rastin
t’jua them edhe herë të tjera; “Jini përherë shërbëtorë të sigurisë e të lirisë”
së popullit tuaj. Kryejeni ndershmërisht e krishterisht detyrën tuaj, bashkëpunoni
me gjithë zemër për ta bërë të qëndrueshme paqen në botë, duke vijuar me bujari misionet
humanitare të solidaritetit ndërkombëtar, që ju janë besuar. Duke u gjunjëzuar
para këtij Altari, që përkujton flijimin fisnik të sa e sa jetëve njerëzore, dëshiroj
t’i shpreh nderimin tim Atdheut italian, për të cilin këta të rinj ranë heroikisht
në betejë. Gjunjëzohem e lutem, simbolikisht, në mbarë vendet e botës, ku pushojnë
në paqe të rënët e të gjitha luftërave e, posaçërisht, ata që bëjnë gjumin e mbramë
në varrezën e afërt austro-hungare. Njëkohësisht dëshiroj t’u drejtoj të gjithëve,
me zërin e tyre, ftesën për paqe: paqe për trojet tuaja, paqe për Kombin e dashur
italian, paqe për Evropën e botën mbarë. Hyji i mbrojtët e i bekoftë gjithë të
pranishmit, Italinë e mbarë njerëzimin.