Përshëndetja e Papës ndeshjes së futbollit për paqen në Stadiumin Olimpik
Sporti e feja takohen për paqen në botë. Kjo është sinteza dhe domethënia, që i dha shtytjen organizimit të lojës, ideja e së cilës lindi nga takimi i Papës Françesku
me lojtarin argjentinas Zanetti. Fitimet iu dhuruan dy strukturave edukative rinore
argjentinase (Scholas Occurrentes dhe Fondacionit P.U.P.I. Onlus). Loja u luajt mbrëmë
në Stadiumin Olimpik të Romës, në praninë e 20 mijë dashamirëve të futbollit. Duatrokitja
e parë ishte për Papën që, përmes një videomesazhi, pohoi arsyet e kësaj ndeshjeje
të parë ndërfetare për paqen: feja e sporti, së bashku, kundër luftës! Pastaj, për
kampionët e sotëm e të djeshëm, që me lojën e tyre i përcollën botës mesazhin universal
të paqes, duke i thënë kurrë më luftës. Ishin aty, në fushë, Shevchenko, Buffon, Baggio,
Muslera, Simeone, e posaçërisht, Diego Maradona.
Ati i Shenjtë i takoi dje
pasdite, në Vatikan, pjesëmarrësit dhe organizatorët. I takoi e u foli fjalë për t’u
medituar, kushtuar sportit, që mund të bëjë shumë për bashkëjetesën paqësore, falë
forcës së tij komunikative. Ati i Shenjtë i falënderoi futbollistët, që po e vinin
në jetë dëshirën e tij për t’i parë kampionët dhe trajnerët e vendeve të ndryshme
e të feve të ndryshme, duke u ndeshur në një garë sportive, për të dëshmuar ndjenjat
e vëllazërisë e të miqësisë. Kujtoi, më pas, se ndeshja do të shërbejë edhe për
të mbledhur fonde, në ndihmë të projekteve të solidaritetit, por sidomos, për të reflektuar
mbi vlerat universale, që mund të favorizojnë sportet në përgjithësi, e futbolli,
në veçanti: ndershmërinë, mikpritjen, dialogun, besimin tek tjetri. Janë vlera, që
i bashkojnë njerëzit, pavarësisht nga raca, kultura, besojma fetare. Papa e quajti
këtë ndeshje, gjest i lartë simbolik, që lë të kuptohet se është e mundur të ndërtohet
kultura e takimit dhe bota e paqes, në të cilën besimtarët e feve të ndryshme, duke
ruajtur identitetin e tyre, mund të bashkëjetojnë në harmoni e respekt reciprok. Françesku
e vlerësoi lart rolin e sportit, posaçërisht të futbollit, duke e parë si fenomen
njerëzor e shoqëror, që ka shumë rëndësi e ndikim mbi doket e mendësinë bashkëkohore: “Njerëzit,
posaçërisht të rinjtë, ju shikojnë me admirim për aftësitë tuaja sportive. Ka rëndësi,
prandaj, të jepni shembull të mirë, si në fushë, ashtu edhe jashtë saj. Në ndeshjet
sportive jeni të thirrur të tregoni se sporti është gëzim i të jetuarit, lojë, festë,
e si i tillë, duhet vlerësuar, përmes rifitimit të natyrës së tij pa interes, të aftësisë
për të shtrënguar lidhjet e miqësisë e të hapjes së zemrës për njëri-tjetrin”. Edhe
me sjelljet tuaja të përditshme, vijoi Papa, të ngarkuara me fe, përshpirtëri, humanitet
e vetëmohim, mund të jepni dëshmi në dobi të idealeve të bashkëjetesës paqësore civile
e shoqërore, për ndërtimin e qytetërimit të themeluar mbi dashurinë, solidaritetin
e mbi paqen. E kjo është kultura e takimit: duhet punuar kështu! Në përfundim Papa
uroi që sporti të japë kontributin e vet për bashkëjetesën paqësore të mbarë popujve,
duke përjashtuar çdo diskriminim race, gjuhe e feje, sepse diskriminim do të thotë
përbuzje: “E ju me këtë ndeshje, do t’i thoni ‘jo!’ çdo diskriminimi! Fetë, posaçërisht,
janë të thirrura të bëhen përçuese të paqes e kurrë të urrejtjes, sepse në emër të
Zotit, duhet të çojmë kudo, vetëm dashuri: “Feja e sporti, të kuptuara vërtetësisht,
mund të bashkëpunojnë e t’i ofrojnë mbarë shoqërisë shenja të qarta të një epoke të
re, në të cilën ‘popujt nuk do ta vringëllojnë më shpatën njëri kundër tjetrit”(cfr
Is 2,4). Në përfundim, Papa u përcolli të gjithëve një mesazh: “Zgjerojini
zemrat tuaja, si bën vëllai me vëlla. Ky është një nga sekretet e jetës e, njëkohësisht,
edhe përmasa më e thellë e më e vërtetë e sportit”. Pas këtij inkurajimi, futbollistët
u nisën, të ndjekur nga mijëra sy, drejt stadiumit, për këtë ndeshje kaq të jashtëzakonshme.