Françesku në Engjëllin e Tënzot: të mposhtet, me forcën e Ungjillit, rreziku i mendësisë
së botës
Rreziqet e përshtatjes me mendësinë e botës mund të mposhten me forcën e Ungjillit:
kështu u shpreh sot Papa në lutjen e Engjëllit të Tënzot, duke i ftuar të gjithë besimtarët
ta dallojnë vullnetin e Zotit në jetën e tyre e ta jetojnë këtë vullnet. Pastaj, urimi
për ta respektuar natyrën, në prag të Ditës për mbrojtjen e krijimit, që do të kremtohet
nesër në Itali.
I frymëzuar
nga Ungjilli i së dielës, Papa nënvizoi posaçërisht çastin kur Jezusi e qorton Pjetrin,
që nuk arrin ta pranojë një fund aq të përbuzshëm për Mjeshtrin, sepse Apostulli nuk
mendon sipas Zotit, por sipas njerëzve, pa u kujtuar fare se është nën tundimin e
shejtanit. Ndërsa Shën Pali Apostull, kujtoi Papa, u shkruan të krishterëve të Romës:
“Mos ju përshtatni parimeve të shekullit, por shndërrojeni e përtërijeni mendjen tuaj
në mënyrë që ta dalloni vullnetin e Hyjit: çka është e mirë, çka i pëlqen Atij, çka
është e përsosur”(Rom 12.2): “Në të vërtetë ne të krishterët
jetojmë në botë, të përfshirë plotësisht në realitetin shoqëror e kulturor të kohës
sonë, e kjo është plotësisht e drejtë; por prej këndej lind rreziku që të bëhemi ‘njerëz
të botës’, që kripa ta humbasë shijen, siç do të thoshte Jezusi, domethënë, që i krishteri
të ligështohet, ta shkarkojë ngarkesën e së resë, që e ka në shpirt e që i vjen nga
Zoti e nga Shpirti Shenjt”. Përkundrazi, nëse forca e Ungjillit mbetet e gjallë,
mund t’i shndërrojë gjykimet, vlerat, interesat, mendimet, modelet e jetës. Prej
këndej, është e nevojshme të përtërihemi vazhdimisht, duke thithur limfën e Ungjillit.
Por, si mund ta bëjmë këtë, në jetën tonë? Posaçërisht, duke e lexuar e duke e medituar
Ungjillin çdo ditë, që Fjala e Krishtit të jetë përherë e pranishme në jetën tonë: “Mos
harroni: do t’ju ndihmojë Ungjilli, nëse e mbani gjithnjë me vete. Një Ungjill i vogël,
në çantë, në xhep, që ta lexoni gjatë ditës një pjesëz. Po gjithnjë me Ungjillin pranë,
sepse ju sjell Fjalën e Jezusit, që mund ta lexoni e ta meditoni”. Pastaj,
duke marrë pjesë në meshë, vijoi të shpjegonte Françesku, posaçërisht në kremtimin
e së dielës, ku takohemi me Zotin e me bashkësinë, dëgjojmë fjalën e Tij e marrim
Eukaristinë, që na bashkon me Të e ndërmjet nesh. E pastaj, për risimin shpirtëror,
kanë shumë rëndësi edhe ditët e ushtrimeve shpirtërore. Prej këndej: “Ungjilli, Eukaristia,
Lutja”. Falë këtyre dhuratave të Zotit, mund t’i përshtatemi, jo botës, po Krishtit,
e ta ndjekim në udhën e tij, udhë e humbjes së jetës, për ta rigjetur: “E humbjes’,
në kuptimin për ta dhuruar, për ta flijuar për dashuri e në dashuri. E kjo kërkon
flijimin, kërkon kryqin, që ta rimarrim përsëri, të pastruar, të çliruar nga egoizmi
e nga hipoteka e vdekjes, përplot me amshim”.
Pas lutjes mariane, Françesku
kujtoi Ditën për mbrojtjen e krijimit: “Uroj të fuqizohet angazhimi i të gjithëve,
institucioneve, shoqatave e qytetarëve, që të mbrohen jeta e shëndeti i njerëzve,
edhe duke respektuar ambientin e natyrën”.Një përshëndetje e posaçme, ndërmjet
sa e sa të tjerave, ishte ajo, drejtuar pjesëmarrësve të shoqatës bamirëse “Scholas
Occurentes”, së cilës do t’i dorëzohen fitimet e ndeshjes ndërfetare të futbollit
për paqen, që do të luhet nesër në Stadiumin Olimpik të Romës, për të financuar projektin
“Një alternativë për jetën”.