Një e diel nga veprimtaria e Kishës katolike nëpër botë
Vatikan: Rifillon nesër Mesha e mëngjesit, kryesuar nga Papa Françesku, me
pjesëmarrjen e besimtarëve. Si zakonisht, kremtimi do të vijojë të mbahet në kapelën
e Shtëpisë së Shën Martës, në Vatikan. E po nesër fillon edhe vizita “ ad Limina”
e ipeshkvijve të Kamerunit.
Një vit më parë kardinali Pietro Parolin emërohej
Sekretar i Shtetit të Shenjtërisë së Tij. Sekretari i Shtetit të Vatikanit, imzot
Parolin, lindi në Schiavon, në provincën e Viçencës (Itali) më 17 janar 58 vjet më
parë. 25 vjeç u shugurua meshtar e u emërua zëvendës-famullitar në bashkësinë kishtare
të së Shenjtueshmes Trini, në Schio. Në vitin 1983 hyri në Akademinë Kishtare Papnore.
Filloi, pastaj, shërbimin diplomatik pranë Selisë së Shenjtë, duke nisur nga nunciatura
apostolike e Nigerisë e më pas, ajo e Meksikës. Pastaj u kthye në Romë ku, në vitin
2001, u emërua zëvendës-sekretar, i ngarkuar për Marrëdhëniet me Shtetet, duke iu
kushtuar, në mënyrë të veçantë, marrëdhënieve ndërmjet Selisë së Shenjtë e Vendeve
aziatike, posaçërisht,Vietnamit e Kinës. Dha një kontribut shumë të rëndësishëm në
aderimin e Vatikanit në Traktatin e mospërhapjes së armëve bërthamore. Gjithnjë në
këtë detyrë pranë Sekretarisë së Shtetit të Vatikanit, imzot Parolin u njoh nga afër
edhe me realitetin e Kishës ndër shqiptarë: në Shqipëri, Kosovë, Mal të Zi e vende
tjera, ku jetojnë pakica shqiptarësh. Në vitin 2009 u emërua nunc apostolik në
Venezuelë. Më 12 shtator 2009, Papa Benedikti XVI e shuguroi ipeshkëv, në Bazilikën
e Shën Pjetrit në Vatikan. Po këtu u krijua kardinal nga Papa Françesku, në Konçistorin
e 22 shkurtit 2014. Një vit më parë, duke marrë detyrën e rëndishme, pohoi: “Jam
mëse i vetëdijshëm se shërbimi është i rëndësishëm, kërkues e plot përgjegjësi. Por,
dua të nënvizoj se është edhe apasionues, në këtë epokë të re për Kishën, përuruar
nga papnia e Françeskut. Përparësi ka shndërrimi misionar i Kishës, në një Kishë që
shkon mes njerëzve, siç thotë Papa, një Kishë në gjendje të përhershme misioni”.
Milano: U përkujtua sot dyvjetori i vdekjes së kardinalit Carlo Maria Martini,
që ndërroi jetë më 31 gusht 2012. Sot, në orën 17.30, në katedralen e Milanos,
kryeipeshkvi i Qytetit veri-italian, kardinali Angelo Scola, kryesoi kremtimin eukaristik,
duke kujtuar njëkohësisht dy përvjetore: 2-vjetorin e vdekjes së kardinalit Martini
dhe 60-vjetorin e vdekjes së të Lumit kardinal, Ildefonso Schüster.
Në Kolumbi,
Konferenca ipeshkvnore vendase organizoi sot një mbledhje kombëtare lëmoshësh. Nisma
organizohet çdo vit, të dielën e fundit të gushtit, në kuadrin e fushatës: “Dona nobis”
- “Bukën tonë të përditshme epnae neve sot”.
Angli: u kremtua, në Mbretërinë
e Bashkuar, një Meshë për gjithë të persekutuarit për shkak të fesë në mbarë botën.
Ftesa për këtë kremtim është e kapelanit ushtarak të Anglisë dhe Uellsit, imzot Richard
Moth. Gjatë Meshës, sipas ndjetit të prelatit, u tha një lutje drejtuar Zotit për
t’i mbrojtur të gjithë të persekutuarit e botës.
Poloni: nisi sot vizita
triditore e kryetarit të Konferencës ipeshkvnore gjermane, kardinalit Reinhard Marx.
Prelati i lartë do të ndalohet posaçërisht në Gliwice e në Varshavë, për kremtimet
përkujtimore të 275-vjetorit të pushtimit të Polonisë nga trupat naziste, më 1 shtator
1939, me pasoja të tmerrshme për kombin. Kardinalin gjerman e shoqëron ipeshkvi i
Gorlitz, imzot Wolfgang Ipolt.
Ishujt Mauritius: Nisi dje e do të vijojë
deri më 6 shtator, Asambleja e 28-të e CEDOI(Konferencës ipeshkvnore të ishujve Mauritius,
Riunione, Seyzhelles, Rodrigues e Comore). Takimi me temë: “Roli i rregulltarëve
në ungjillëzimin e ri në ishujt tanë, sot”, do të mbahet në ishullin e Riunionit.