Më 18 gusht përkujtohen Shën Lauri e Flori. Binjakë e martirë, qenë mjeshtër
të skulpturës. Kur mësuesit e tyre, të krishterë si ata, pësuan martirizimin nën perandorin
Adrian (117-138), dy vëllezërit vendosën ta braktisnin Bizancin dhe u vendosën në
gadishullin ballkanik, në qytetin e Ulpjanës (sot në Kosovë). I biri i perandoreshës
Elpida, Licinius, u kërkoi trë ndërtonin një tempull dhe gjatë punimeve ndodhi një
gjë e pazakontë: birit të priftit pagan Anastas i hyri në sy një ashkël guri, por
vëllezërit ia shëruan syrin e verbuar, prandaj djaloshi me emrin Aleksandër u bë i
krishterë. Kur Lauri i Flori panë se në tempull kishin vendosur shtatoret e perëndive
pagane, gjatë natës hynë në tempull dhe i thyen shtatoret. Për shkak të këtij akti
u dënuan me varrosje për së gjalli.
Më 19 gusht përkujtohet Shën Sara.
Me daljen e Abrahamit nga toka e Karranit, zënë fill ngjarjet që do të çojnë në themelimin
e popullit të zgjedhur. Në këtë proces Sara luan një rol themelor. Nëpërmjet Sarës
realizohet premtimi i Hyjit për Abrahamin. Ajo lindi Isakun, birin e premtimit, atin
e Jakobit, të cilin Hyji do ta quajë Izrael.
Më 20 gusht përkujtohet
Shën Shën Bernardi i Clervosë, themeluesi i Urdhrit Cestercens. Bindja ndaj Kishës
dhe dashuria që pati për të, e shtynë shpesh herë ta braktiste qetësinë e manastirit,
për t’iu kushtuar çështjeve të ndërlikuara politike e fetare të kohës së vet. Mjeshtër
i udhëheqjes shpirtërore dhe edukues i një breznie të tërë shenjtorësh, la pas një
sërë shkrimesh dhe komentesh biblike, dokumente të rëndësishme të teologjisë murgare,
që i qaset misterit si diçka që duhet jetuar më shumë sesa hulumtuar. Shën Bernardi
vdiq më 20 gusht 1153.
Më 21 gusht përkujtohet Shën Piu X. Giuseppe
Sarto, ipeshkëv i Mantovës më parë, e pastaj i Venecies, u ul në katedrën e Pjetrit
me emrin Piu X. Është papa i parë, pas shumë shekujsh, që rridhte nga një familje
fshatare. Para se të bëhej papë i kishte kaluar të gjitha etapat e shërbesës baritore,
duke filluar nga detyra e kapelanit. Si Papë, mbrojti integritetin e doktrinës
së fesë, i kushtoi vëmendje të veçantë kungimit eukaristik për fëmijët, nisi reformën
ligjore në Kishë, u mor me Veprimin Katolik, u kujdes për përgatitjen e priftërinjve,
shkroi katekizmin e ri, mbështetiu lëvizjet biblike dhe u interesua për reformën liturgjike.
Më 22 gusht përkujtohet Zoja Mbretëreshë e Qiellit dhe e Tokës. Kremtimin
liturgjik e themeloi Papa Piu XII më 1955. Maria është mbretëreshë, sepse është nëna
e Krishtit mbret. Ajo është mbretëreshë, sepse shkëlqen në shenjtëri. Të gjithë të
krishterët shohin dhe nderojnë tek ajo bujarinë e pamatë të dashurisë hyjnore, që
e ka stolisur me mirësi.
Më 23 gusht përkujtohet Shën Roza nga Lima.
U lind në Limë (Peru) nga një familje fisnike spanjolle, më 1586, dhe emrin e pagëzimit
e pati Izabela. Deshi t’i kushtohej Hyjit si murgeshë klauzure që në moshë të vogël,
por mbeti “virgjër në botë” dhe pati si model jete Katerinën e Sienës. Si ajo, veshi
petkun e Urdhrit të Tretë Domenikan në moshën 20 vjeçare dhe strehoi në shtëpi fëmijë
e pleq të braktisur, të cilëve u shërbeu me përkushtim. Më 1609 u mbyll në një qeli
dy metra katrorë, nga e cila dilte vetëm për të marrë pjesë në kremtimet liturgjike.
Vdiq në shtëpinë e gruas fisnike Maria Ezategui, më 24 gusht 1617.