Ipeshkvijtë katolikë të Shqipërisë: një ditë lutje për të krishterët e Irakut më 17
gusht 2014
Të dashur meshtarë, Motra dhe besimtarë Këto ditë, të gjithë po ndjekim me shqetësim
lajmet nga Lindja e Mesme dhe në veçanti nga Iraku, ku për shkak të fesë po përndiqen
të krishterë dhe njerëz të tjerë. Edhe Papa Françesku, po ndjek me shqetësim këto
ngjarje dhe ka bërë apel për mosheshtjen ndaj kësaj situate të papranueshme dhe vazhdimisht
ka bërë dhe bën thirrje për lutje dhe për ndalimin e dhunës dhe persekutimit. Me
5 gusht na ka mbërritur një letër që Patriarku i Kaldenjëve Fortlumturia e Tij Louis
Sako ia ka drejtuar Atit të Shenjtë Papa Françeskut, të gjithë Patriarkëve të Kishave
Lindore dhe Presidentëve te Konferencave të Kishës Katolike në Europë: në këtë letër
ai shkruan se të krishterët e Irakut po vuajnë një tragjedi të madhe. Ja çfarë
shkruan ai: “Të krishterët e Mosulit, (province irakene e Ninivës), të tmerruar kanë
braktisur qytetin vetëm me rrobat që kishin në trup…Kryqe të djegura, dorëshkrime
të shkatërruara. Dhe nuk ekziston as një ushtri e vërtetë. Po shkohet drejt katastrofës”. Vetë
Kardinali në bashkëpunim me njerëz të besimeve të tjera kanë bërë në Irak një ditë
lutjeje me 6 gusht dhe kanë kërkuar mbeshtetjen tonë me lutjen dhe me sensibilizim
e ndërgjegjeve. Të dashur, edhe ne Ipeshkëvinjtë e Kishës Katolike në Shqipëri
pranojmë ftesën për t’u lutur dhe jemi solidalë me Kishën që vuan në Irak. Prandaj
kemi vendosur që të djelën me datë 17 gusht 2014 në të gjitha Kishat tona t’i drejtojmë
lutjen tonë Hyjit për rikthimim e paqes, për respektimin e të drejtave njerëzore dhe
që njerëz me fe të ndryshme të jetojnë së bashku dhe që askush të mos debohet nga
shtëpia e vet dhe të mos persekutohet për shkak të fesë në Irak dhe në vendet e tjera
ku persekutohen të krishterët. Të dashur, në shekullin XXI nuk mund të tolerohet
më vrasja e një personi për arsye të fesë, sepse sikurse ka thënë edhe Papa Françesku:
“nuk mund të vritet njeriu në emër të Zotit: është një fyerje ndaj Zotit dhe njeriut.” Kërkojmë
ndërmjetësimin e Zojës sonë, Nënës së Këshillit të Mirë, të Nënë Terezës dhe të Shërbëtorëve
të Hyjit: Imzot Vinçenc Prennushi dhe Shokët e tij. Duke ju falenderuar, ju bekojmë. Ipeshkëvinjtë
tuaj