Në rubrikën “Ju kumtojmë Lajmin e Mirë”, vijojmë leximin e Ungjillit sipas Markut,
sot kapitulli 5, 1-20. Jezusi gjendet në rajonin e gerasenëve dhe i del para një njeri
që jetonte nëpër varreza, sepse ishte i pushtuar nga shpirti i keq. Askush nuk kishte
mundur as ta dëbonte shpirtin e papastër, as ta ndalonte dhunën e njeriut të pushtuar.
Sapo Jezusi zbret nga barka (duhet të kujtojmë se sapo kishte qetësuar stuhinë mbi
liqen), njeriu i pushtuar nga shpirti i papastër rend tek ai dhe bërtet me zë të lartë:
“Çfarë ke me ne, o Jezus, Biri i Hyjit të tejetlartë? Të përbej, në emër të Hyjit,
mos më torturo!” (v. 7). “Jezus, Biri i Hyjit
të tejetlartë!”. Shpirti i papastër e njeh Jezusin, por dëshmia e tij nuk është shprehje
e fesë. Përballë Jezusit ai shfaq tërë frikën e vet. Jezusi sapo ka qetësuar stuhinë
mbi leqen, por ka përpara një njeriu me stuhinë në shpirt. Ai ka ardhur për të sjellë
bunacën në shpirtin e njeriut, duke ushtruar pushtetin mbi shpirtin torturues: “Dil,
shpirt i papastër, nga ky njeri!” (v. 8). Fjala e Jezusit është plot autoritet, por
ai dëshiron të njohë emrin e njeriut. Në traditën biblike emri tregon esencën
e njeriut. E keqja dhe mëkati i heqin njeriut esencën dhe e lënë pa emër, pa një thelb
dhe pa bosht të vetin. Njeriu pa emër nuk mund të jetë më zot i jetës së vet, por
shpëtohet vetëm nëse kërkon strehim nën pushtetin e Zotit të vërtetë. Këtë bën i pushtuari
i Ungjillit të sotëm: bie tek këmbët e Jezusit. Nuk është i aftë as të kërkojë çlirimin,
as të thotë emrin e tij: “Quhem legjion, sepse jemi shumë” (v. 9). Çuditërisht,
shpirti i keq i lutet Jezusit të mos e largojë nga ai rajon. Për të kuptuar këtë lutje,
duhet të njohim gjeografinë e Tokës së Shenjtë. Ndodhemi në një zonë të papastër,
sipas konceptit hebraik të pastërtisë. Në një zonë të papastër, të përzier me paganë,
kullosin kafshë të papastra: derrat. Tek derrat i luten Jezusit të shkojnë shpirtrat
e ndytë dhe bashkë me derrat përfundojnë në greminë. Dy detaje e karakterizojnë
këtë tregim: nga njëra anë njerëzit, të trembur nga çfarë kanë parë, i luten Jezusit
të largohet nga krahina e tyre; nga ana tjetër, ish i djallosuri, i çliruar, kërkon
ta ndjekë Jezusin, por ai i përgjigjet: “Shko në shtëpinë tënde, tek njerëzit e tu
dhe kumto çfarë bëri Zoti dhe si pati mëshirë për ty”. Mëshira e Hyjit është burimi
i veprës së tij çlirimtare. Të shkosh pas Jezusit, do të thotë të dëshmosh mëshirën
e tij, siç e ke përjetuar vetë.