Fjala e SH.T. Imzot Rrok Mirdita në Konferencën për shpalljen e Programit të Udhëtimit
Apostolik të Papës Françesku në Tiranë
Dy momente të rëndësishme të Udhëtimit Apostolik të Papës Françesku në Shqipëri me
datë 21 shtator 2014, do të jenë ai i Kremtimit të Meshës në Sheshin Nënë Tereza dhe
takimi që ai do të ketë në Katedralen Metropolitane të Shën Palit me priftërinjtë,
motrat, seminaristët dhe lëvizjet laikale. Për mua si Arqipeshkëv i Tiranës, përbëjnë
dy momente hiri dhe dhurate të veçantë prej Zotit.
Mesha e Shenjtë që Papa
do të drejtojë, në bashkremtim me hierarkët e lartë që do të vijnë bashkë me të, me
ato të Shqipërisë, me miq të ndryshëm të ardhur për këtë rast dhe me të gjithë popullin
e Hyjit, përbën momentin kulmor të kësaj vizite. Për ne të krishterët katolikë Eukaristia
është burimi dhe kulmi i krejt jetës së krishterë e i krejt jetës së Kishës. Prandaj
për këtë moment janë të angazhuara të gjitha dioqezat dhe famullitë që të marrin pjesë
jo vetëm fizikisht, por edhe me një përgatitje shperitërore, që do të bëhet gjatë
gjithë kësaj kohe pritjeje.
Janë angazhuar vullnetarë të shumtë që të bëjnë
organizmin e shtegtarëve, por edhe të parametrave teknikë dhe të sigurisë për mbarëvajtjen
e këtij aktiviteti. Gjithashtu vlen për t’u theksuar edhe bashkëpunimi i mirë që kemi
me autoritetet e pushtetit qëndror dhe vendor për një përgatitje sa më dinjtoze, për
këtë ngjarje që do të jetë në sheshin Nënë Tereza.
Po ashtu Papa Françesku
do të takojë edhe meshtarët, motrat, laikët dhe seminaristët në Katedralen e Shën
Palit në Tiranë. Sikurs e dini kjo Katedrale është e re, por është edhe shenja e ripërtëritjes
së Kishës katolike në Shqipëri. Kujtojmë se kur ishte Gjon Pali II ajo nuk ekzistonte,
por tani një Papë tjetër korr frytet e asaj vizite historike e ka mundësi t’u drejtohet
të gjithë vepruesve kishtarë pikërisht nga Kisha amë e të gjitha kishave të Arkidioqezit
të Tiranës.
Meshtarët dhe motrat janë ata që me përkushtim të veçantë punojnë
me besimtarët, por edhe me ata që nuk janë besimtarë apo kanë një besim tjetër, sidomos
në qëndrat e ndryshme baritore, shëndetësore, shkollat, oratoret, qëndrat komunitare
për edukim dhe zhvillim të personave, të shpërndarë në mënyrë kapilare në të gjithë
Shqipërinë.
Kjo vizitë është një dhuratë për Katedralen tonë dhe për bashkësinë
tonë dioqezane e kishtare shqiptare.