Në Gazë punohet për armëpushimin. Goditet shkolla e OKB-së: 17 viktima
Orë të ethshme bisedimesh në Lindjen e Mesme për të arritur një armëpushim humanitar,
që t’i detyrojë të heshtin armët në Rripin e Gazës. Ndërkaq, luftimet izraelito-palestineze
kanë arritur në ditën e tyre të 18-të, duke lënë pas rreth 800 të vdekur nga ana palestineze
e 33 nga ana izraelite. Nuk kursehen as vendet, që konsideroheshin të sigurta, si
shkolla e OKB-së në Beit Hanun, ku sulmi izraelit i djeshëm shkaktoi 17 viktima e
200 të plagosur, duke zgjuar protestën e të gjithë botës. Shpresohet në përgjigjen
pozitive ndaj planit, paraqitur të dyja palëve nga Sekretari i shtetit amerikan, John
Kerry, i cili sot do të largohet nga Kajro, ku përveç Sekretarit të përgjithshëm të
OKB-së Ban Ki-mun mbërriti edhe ministri i jashtëm anglez. Sipas propozimit në
tryezën e bisedimeve, luftimet do të ndalen për një javë, duke filluar që nesër. Gjatë
kësaj kohe, do të vazhdojnë dialogun për një armëpushim më të qëndrueshëm. Ndërkaq,
ushtria izraelite do të vazhdojë të qëndrojë brenda Rripit të Gazës për të gjetur
e shkatërruar tunelet, që përdoren si depo armatimesh, por edhe si kalim për mercenarët.
Kreu i Hamasit, Khaled Meshaal, ka deklaruar se e dëshiron armëpushimin, por ai duhet
të shoqërohet me fundin e bllokimit të Gazës. Dje, mori detyrën presidenti i ri
i Izraelit, Reuven Rivlin, me një ceremoni, që nuk do të harrohet për shkak të përshëndetjes
së lamtumirës e të urimit mallëngjyes për paqe të ish-kryetarit të shtetit, Shimon
Peres. Sot, Këshilli ministror i sigurisë duhet të përcaktojë afatet e një armëpushimi
humanitar prej disa ditësh, i cili mund të shtyhet deri në fund të Ramazanit, javën
e ardhshme.