Meriam e lirë, por një grua tjetër, nënë e 8 fëmijëve, detyrohet të heqë dorë nga
krishterimi
Siç ju njoftuam në emisionin e djeshëm, gruaja e krishterë sudaneze, Meriam, dhe familja
e saj mbërritën në Itali, ku u takuan edhe me Papën Françesku. Ati i Shenjtë e falenderoi
për qëndresën e saj në fe. Vërtet, Meriam nuk pranoi të kthehej në fenë myslimane,
pavarësisht se e dënuan me vdekje për apostazi, vetëm sepse ishte martuar me një të
krishterë. Ajo konsiderohej nga Sudani myslimane, pasi i ati është mysliman, por Meriam
ka jetuar gjithnjë me nënën e krishterë, e cila e ka edukuar me këtë fe. U detyrua
të lindë në pranga vajzën, që mbante në bark, por tani vuajtjet e saj morën fund.
Ndodhet në Itali, në pritje për t’u nisur për në SHBA-të, ku do të banojë së bashku
me të shoqin. Rasti i Meriamit është emblematik. Po në Sudan, një grua tjetër,
nënë e 8 fëmijëve, është detyruar ta mohojë fenë e krishterë publikisht, për të shpëtuar
nga dënimi. Në shumë vende të botës nuk ekziston e drejta për lirinë fetare e në disa
të tjerë, pavarësisht se njihet zyrtarisht, nuk respektohet. Folëm për këtë me kryetarin
e Komisionit të Konferencës Ipeshkvnore Italiane për ekumenizmin dhe dialogun ndërfetar,
imzot Mansueto Bianchi: Kur flasim për
lirinë fetare, nuk kemi të bëjmë me çdo lloj lirie e aq më pak, me një liri të dorë
së dytë në jetën e njeriut. Ajo është baza e të gjitha lirive, sepse është fjala për
një botë bindjesh e vlerash, të cilat i kanë rrënjët thellë në shpirtin e njeriut.
Prej tyre njeriu nxjerr orientime, kritere për marrjen e vendimeve, për gjykimet,
për marrëdhëniet. E mungesa e lirisë fetare dëmton drejtpërdrejt rrënjët e dinjitetit
të njeriut. Duke dëmtuar kështu, themelet e çdo lirie. Meriami mallëngjeu
botën: grua, shtatzënë në muajin e tetë, lindi në burg, e dënuar me fshikullim e me
vdekje, sepse nuk deshi ta mohojë fenë e vet. Po të tjerat? Reflektimi mbi problemin
e lirisë fetare duhet të jetë më i gjerë, apo jo? Besoj se po. Sidomos, mendoj
se duhet të impenjohemi për ta respektuar me të vërtetë ndërgjegjen e njeriut. E kjo
nuk vlen vetëm për një zonë të caktuar gjeografike apo kulturore; vlen edhe për Perëndimin
tonë, që e konsideron veten kaq të përparuar. Duhet ta njohim parësinë e ndërgjegjes
së njeriut e ta respektojmë atë, ta kthejmë në vlerë, brenda së cilës askush nuk duhet
të guxojë të hyjë me hap ushtarak, duke përplasur fort këmbët, duke e manipuluar.
Rasti i Meriamit ishte vërtet i tmerrshëm, sepse një grua u poshtërua aq shumë sa
e detyruan të lindë në burg, e lidhur me zinxhirë. Jo vetëm u shkel dinjiteti i kësaj
gruaje, por, në një farë kuptimi, u shkel dinjiteti i vendit dhe i njerëzve, që e
menduan dhe e zbatuan këtë lloj qëndrimi ndaj Meriamit. Është akt absolut çnjerëzor,
që duhet dënuar e hedhur poshtë pa asnjë diskutim, duke e vënë në punë inteligjencën
e ndërgjegjen për të vigjëluar që këto gjëra të mos ndodhin më. Por, fatkeqësisht,
po ndodhin kudo përreth nesh. Dua të shtoj edhe një gjë tjetër: do të doja që këto
ngjarje të mos na bindin për të hyrë në rrugë të ashpra reciprociteti me këto vende
e me këto kultura, siç mund të na këshillojë instinkti. Duhet të na ndihmojnë për
të besuar edhe më shumë në rrugën e dialogut, që duhet ta praktikojmë ne të parët,
sidomos me anëtarët e atyre vendeve, të atyre kulturave e të atyre përvojave fetare,
që i dënojnë këto ngjarje. Një dialog, në të cilin mund të jenë protagonistë
edhe laikët: kujtojmë këtu se e drejta për lirinë fetare është edhe e drejtë për të
mos besuar, prandaj përfshin edhe jo besimtarët… Sigurisht. E më duket e rëndësishme
dhe interesante. Kemi dëgjuar ndonjë zë alarmues… por, të them të drejtën, do të kisha
dashur të dëgjoj ndonjë zë më të lartë e më të shpeshtë e, madje, edhe ndonjë zë më
shumë nga bota islamike. Megjithatë, e përsëris, këtu, më shumë se me problem fetar,
kemi të bëjmë me një problem të arsyes dhe të ndërgjegjes.