Selia e Shenjtë për Gazën: nuk ka të fituar nëse nuk ndalet dhuna
“Zërin e arsyes duket se po e mbyt zhurma e armëve”. Kështu pohoi dje Imzot Silvano
Maria Tomasi, gjatë seksionit të veçantë të Këshillit të OKB-së së Gjenevës për të
drejtat a njeriut, që iu kushtua përshkallëzimit të konfliktit izraelito-palestinez.
Vëzhguesi
i përhershëm i Selisë së Shenjtë pranë zyrës së Kombeve të Bashkuara në qytetin zviceran
theksoi se “dhuna nuk do të çojë askund, as tani as në të ardhmen. Kryerja e padrejtësive
dhe dhunimi i të drejtave të njeriut, veçanërisht i të drejtës për të jetuar dhe për
të jetuar në paqe e siguri – vijoi Imzot Tomasi – hedhin farën e freskët të urrejtjes
e të mërisë. Po zë rrënjë kultura e dhunës, frytet e së cilës janë shkatërrimi dhe
vdekja. Për një kohë të gjatë nuk do të ketë fitimtarë në tragjedinë aktuale, por
vetëm më shumë vuajtje. Pjesa më e madhe e viktimave janë civilë, të cilët duhet t’i
mbrojë e drejta humanitare ndërkombëtare. Kombet e bashkuara thonë se rreth shtatëdhjetë
për qind e palestinezëve të vrarë janë civilë të pafajshëm. Kjo është e patolerueshme,
sikurse edhe raketat e hedhura pa kriter drejt objektivave civile në Izrael. Ndërgjegjet
janë mpirë për shkak të klimës së gjatë të dhunës, e cila e kërkon zgjidhjen me anë
të asgjësimit të tjetrit. Demonizimi i të tjrëve, megjithatë, nuk i zhduk të drejtat
e tyre. Përkundrazi, rruga për të ardhmen gjendet duke njohur njerëzinë tonë të përbashkët”. Imzot
Tomazi citoi fjalimin e mbajtur nga Papa Françesku në Betlehem, gjatë shtegtimit në
tokën e Shenjtë: “Për të mirën e të gjithëve – pati thënë Papa – është e nevojshme
të shtohen përpjekjet dhe nismat për të krijuar kushtet e një paqeje të qëndrueshme,
të mbështetur në drejtësinë, në pranimin e të drejtave të secilit dhe në sigurionë
e ndërsjellë. Ka ardhur çasti për të gjithë për të gjetur guximin e bujarisë dhe të
krijimtarisë në shërbim të së mirës, guximin e paqes, që mbështetet në pranimin nga
ana e të gjithëve të së drejtës së dy shteteve për të ekzistuar dhe për të gëzuar
paqen dhe sigurinë brenda kufinjve të njohur ndërkombëtarisht”. “Aspirata e ligjshme
për siguri nga njëra anë – vijoi prelati – dhe për kushte dinjitoze për jetesë nga
ana tjetër, që mundësojnë arritjen e mjeteve normale të jetesës, si barnat, ujin dhe
vendin e punës, përbën një të drejtë njerëzore themelore, pa të cilën paqja është
shumë e vështirë të ruhet”. “Përkeqësimi i gjendjes në Gazë – tha imzot Tomasi
– bën thirrje të pareshtur për ta ndërprerë zjarrin menjëherë dhe për të nisur negociatat
për paqen e qëndrueshme”. “Paqja do të sjellë dobi të pafundme për popujt e këtij
rajoni dhe për mbarë botën” – pati thënë Papa Françesku – “prandaj duhet ndjekur
me vendosmëri, edhe pse secila palë duhet të flijojë diçka”. “Është përgjegjësi e
bashkësisë ndërkombëtare – nënvizoi më tej Imzot Tomasi – të angazhohet në mënyrë
serioze për të kërkuar paqe dhe për të ndihmuar palët në këtë konflikt të arrijnë
një mirëkuptim, me qëllim që ta ndalin dhunën dhe të shikojnë drejt së ardhmes me
besim të ndërsjellë”. Përfaqësuesi i Vatikanit përsëriti se “dhuna nuk jep kurrë
fryte. Dhuna do të sjellë vetëm më shumë vuajtje, rrënim e vdekje, dhe do ta pengojë
paqen të bëhet realitet. Strategjia e dhunës mund të jetë ngjitëse e të bëhet e pakontrollueshme.
Për të luftuar dhunën dhe pasojat e saj negative – nënvizoi – nuk duhet të mësohemi
me vrasjet. Në një çast kur brutaliteti është i zakonshëm dhe shkeljet e të drejtave
njerëzore janë të kudondodhura, nuk duhet të bëhemi indiferentë, por duhet të përgjigjemi
në mënyrë pozitive, për ta zbutur konfliktin, që na përket të gjithëve”. Mediat
– vuri në dukje Imzot Tomasi – “duhet ta pasqyrojnë në mënyrë të drejtë e të paanshme
tragjedinë e të gjithë atyre që vuajnë për shkak të konfliktit, me qëllim që të lehtësojnë
zhvillimin e dialogut të asnjëanshëm, duke njohur të drejtat e të gjithëve”. “Qerthulli
i përsëritur i kahmarrjes dhe i kundërpërgjigjeve duhet të marrë fund” – përfundoi
vëzhguesi i përhershëm i Selisë së Shenjtë pranë OKB-së së Gjenevës. “Me dhunë, burrat
e gratë do të vijojnë të jetojnë si armiq e kundërshtarë, por në paqe mund të jetojnë
si vëllezër e motra”.